Azərbaycan Dövlət Musiqili Teatrı iyun ayında ölkəmizdə keçiriləcək Avropa Oyunları ilə bağlı xüsusi tədbirlər planı hazırlayıb.

Axar.az xəbər verir ki, teatrın direktoru Əliqismət Lalayev Musiqili Teatrın Bakı-2015 Avropa Oyunları ilə əlaqədar iyun ayında xüsusi repertuar əsasında fəaliyyət göstərəcəyini deyib:

"İyun ayında teatrımızda 15 tamaşanın 24 dəfə nümayiş olunması nəzərdə tutulur. Bu səhnə əsərlərinin siyahısına klassik, müasir və uşaq tamaşaları daxildir. Bildiyiniz kimi, gələn ay ölkəmizə dünyanın müxtəlif ölkələrindən qonaqların – turistlərin, azarkeşlərin gəlməsi gözlənilir. Buna görə də repertuarımızda olan bir sıra əsərləri ingilis dilinə tərcümə etmişik. Yeri gəlmişkən, bəzi tamaşalarımız rus dilində nümayiş olunacaq. Bütün bunları nəzərə alaraq tam məsuliyyətlə qeyd edə bilərəm ki, Azərbaycan Dövlət Musiqili Teatrı Birinci Avropa Oyunlarına hazırdır".

Xatırladaq ki, 12-28 iyun tarixində ölkəmizdə keçiriləcək Birinci Avropa Oyunlarına 36 gün qalıb.