Bakı-2015 birinci Avropa Oyunlarının başlaması ilə əlaqədar Quba Turizm İnformasiya Mərkəzi gücləndirilmiş iş rejiminə keçib. Rayona gələcək qonaqların çoxluğu nəzərə alınaraq mərkəz istirahət və bayram günlərində də fəaliyyət göstərəcək.

Mərkəzin direktoru Murad Hacıyev AZƏRTAC-a müsahibəsində bildirib ki, turistlərin rayonda istirahətini təmin etmək üçün "qaynar xətt" yaradılıb. Əcnəbi və yerli turistlər 24 saat ərzində (070) 530-76-70 nömrəsinə zəng edərək istirahət mərkəzləri, turizm marşrutları barədə ətraflı məlumat ala bilərlər.

Qubaya gələn turistlər 4 turizm marşrutundan faydalana bilərlər. Bunlar Quba-Xınalıq, Quba-Afurca, Quba-Ləzə və Quba-Xanəgah istiqamətlərində olan marşrutlardır. Hər 4 marşrut üzrə turistlərin sıxlığı müşahidə olunur.

Rayonda fəaliyyət göstərən 36 istirahət mərkəzinin hər birində yay turizm mövsümünə hazırlıq işləri yekunlaşıb. Ötən ilə nisbətən istirahətə gələnlərə göstərilən xidmət növlərinin sayı və keyfiyyəti də artırılıb.

Quba Turizm İnformasiya Mərkəzi tərəfindən turistlərə ödəniş əsasında nəqliyyat vasitəsi və bələdçi təqdim olunur.