"Avropa Oyunlarının açılış mərasimi çox möhtəşəm keçdi".

Bu sözləri xalq artisti Mənsum İbrahimov I Avropa Oyunlarının açılış mərasimi ilə bağlı Axar.az-a danışarkən deyib:

"Ən çox xoşuma gələn isə hər şeyin sırf milli üslubda tərtib olunması idi – məsələn, muğamla başlaması, balaban, "Sarı gəlin", Qobustan qayaüstü rəsmləri, Yallı və s. Məni sevindirən bir şey də o oldu ki, milli komandamız bayraqlarımızla keçəndə mənim ifa etdiyim "Qarabağ şikəstəsi" səsləndi – öz səsimi eşitməyim özüm üçün də gözlənilməz oldu.

Bu yarışda bütün idman növlərində ölkəmizi dəstəkləyirəm. Məncə, güləşçilərimiz daha çox medal qazanacaqlar. İstərdim, qızıl medalların çoxu elə Bakıda qalsın".

Mənsum İbrahimov qonaqlar üçün konsert proqramları və sürprizlər hazırlandığını da deyib:

"Bu oyunlarla bağlı bir çox konsert proqramı təşkil olunub, avropalı qonaqlara xeyli sürprizlər var. Bu ayın 18-də xarici qonaqlar üçün Heydər Əliyev Sarayında mənim rəhbərliyim altında tələbələrimlə birlikdə "Gəncləşən muğam" axşamımız olacaq. Ayın 20-də isə Opera və Balet Teatrında Nəzakət Teymurova ilə dahi Üzeyir bəyin "Leyli və Məcnun" əsərini ifa edəcəyik".