"Avropa Oyunlarının açılış günüdən başlayaraq bütün oyunlarla bağlı təəssüratlarım yüksələn xətlə inkişaf edir. Oyunlardan qazandığımız medallar təki daha da çoxalsın, bizlər bir az da tıxaclarda gözləyərik".

Bu sözləri Axar.az-a "Həftə.az" saytının baş redaktoru Səbinə Əvəzqızı Avropa Oyunları ilə bağlı təəssüratlarını və izlədiyi oyunlar haqda fikirlərini bildirərkən deyib.

S.Əvəzqızının da bir çox həmkarı kimi oyunları canlı olaraq izləmək imkanı olmasa da, təşkilatçılıq və qazanılan uğurlarla bağlı təəssüratı yüksəkdir.

Beləliklə, baş redaktorların Avropa Oyunları ilə bağlı fikirlərini təqdim edirik:

Səbinə Əvəzqızı, "Həftə.az"ın baş redaktoru:

"Avropa Oyunları çərçivəsində keçirilən oyunları canlı izləmək imkanım olmayıb. Çünki yarışlar başlayandan işlərimiz 2 qat artıb. Oturub kompüter arxasında həm oyun izləyirik, həm də çalışırıq. Açığı, təəssüratımın belə olacağını heç düşünməmişdim. Açılış günündən başlayaraq təəssürat yüksələn xətlə inkişaf edir. Təki medallar daha da çoxalsın, bizlər bir az da tıxaclarda gözləyərik.

Medal qazananlar barəsində yaxşı mənada çox şey demək olar. Hamısına təşəkkür edirəm, bizi fərəhləndirdikləri üçün. Düzü, güləşçimiz Toğrul Əsgərovla bağlı o qədər yazmışdılar ki, guya şöhrət onu dəyişib–filan. O qazananda daha çox sevindim. Bağlanış mərasimində isə iştirak etməyi çox istəsəm də, inanmıram imkan olsun. Yuxarıda dediyim kimi, iş rejimimiz elədir ki, belə bir lüksümüz olmur".

Rəşad Məcid, "525-ci qəzet"in baş redaktoru:

"Avropa Oyunlarının Bakıda keçirilməsini mən böyük, tarixi hadisə hesab edirəm. Bu tarixi hadisəni izləməmək olmazdı. Bu səbəbdən müxtəlif oyunları izləmək üçün özüm şəxsən 100-dən artıq bilet almışam. Bir çox həmkarlarıma da biletlər vermişəm. Hazırda da Azərbaycan Gimnastika Arenasındayam və oyunları izləyirəm, böyük zövq alıram. Bundan başqa, yüngül atletika, üsgüçülük, sinxron üzgüçülük, su polosu yarışlarını da izləyəcəyəm. Mən daha çox idmanın incəsənətlə, musiqi və rəqslə bağlı olan növlərinə maraq göstərirəm. Həm də cüdo, karate, boks, voleybol kimi yarışları Bakıda adi günlərdə də izləmək mümkündür. Ancaq sinxron üzgüçülük, su polosu yarışları Azərbaycan üçün xarakterik idman növü olmadığına görə bu fürsəti əldən vermək istəmirəm. Həmçinin bədii gimnastika yarışlarında da rəqs, idman, müsiqinin vəhdəti məni belə oyunlara baxmağa sövq edir. Bağlanış mərasiminə isə getmək fikrim var idi, ancaq təəssüf ki, bilet tapa bilmədim. Ümid edirəm ki, təşkilatlardan, dövlət orqanlarından, əvvəlcədən bilet sifariş edən qurumlardan hansısa mənə də bilet hədiyyə edəcək".

Rauf Arifoğlu, "Yeni Müsavat" qəzetinin baş redaktoru:

"Birinci Avropa Oyunlarına akkreditə olunduğuma görə, oyunları izləmək üçün bilet problemim də yoxdur. Lakin xaricdə olduğuma görə hələ oyunlara gedə bilməmişəm. Ancaq qapanış törəninə və bir neçə oyuna baxmağı düşünürəm. Bu mərasimə mənə bilet ayırıblar - akkreditə olunmuş jurnalistlərlə birgə. Orada olmağa çalışacağam. Oyunlar ərəfəsində nə qədər medal qazanılması isə məncə, ikinci plandadır. Çünki əsas olan Avropa Oyunlarının ilk dəfə Bakıda keçirilməsidir. Statistika sonra gəlir".

Elçin Mirzəbəyli, "Xalq cəbhəsi" qəzetinin baş redaktoru:

"İlk Avropa Oyunlarının açılış mərasimində həmkarlarımla birlikdə iştirak etmişəm və çox böyük zövq almışam. İnşallah, qismət olarsa, bağlanış mərasimində də iştirak edəcəyəm. Oyunları isə canlı olaraq izləmək imkanım olmayıb. Bir baş redaktor, media təmsilçisi olaraq əsas vəzifəmi vətənimiz üçün böyük önəm daşıyan Avropa Oyunlarına informasiya dəstəyi verməkdə, analitik yazılar hazırlamaqda görürəm. Gün ərzində imkan düşdükcə "İdman Azərbaycan" kanalında yayımlanan yarışları izləyirəm. İdmançılarımızın uğurlarına sevinirəm, həyəcan keçirirəm. Qazanılmış medallar şübhəsiz ki, məni qane edir və hesab edirəm ki, oyunların sonunadək Azərbaycan idmançıları daha böyük uğurlara imza atacaqlar. Oyunlar zamanı məni ən qürurlandıran məqam isə gənc taekvandoçumuz Ayxan Tağızadənin Azərbaycan himnini ifa etməsi oldu. O anı unuda bilmirəm. Çox ürəkdən oxuyurdu. Və arzu edərdim ki, bütün idmançılarımız ondan örnək götürsünlər".

Hacıbəy Heydərli, "Azxeber.com" saytının baş redaktoru:

"İlk Avropa Oyunlarının ölkəmizdə keçirilməsi çox məsuliyyətli və qürurvericidir. Avropa Oyunları çərçivəsində keçirilən idman yarışlarını yaxından təqib etməyə çalışıram, demək olar ki, bütün yarışları izləyirəm. Arenadan isə sərbəst güləşçilərin yarışını izlədim və təəsüratım çox yüksəkdir. Bu yarışlarda mənim ən çox diqqətimi çəkən məqam arenaların bütün yarışlarda dolu olmasıdır. Bağlanış mərasimində də iştirak etməyə çalışacam".