Bu gün I Avropa Oyunları çərçivəsində növbəti yarışlar keçirilir.

Axar.az xəbər verir ki, Milli Gimnastika Arenasında kişi və qadınların batut gimanstikası üzrə sinxronlaşdırılmış təsnifat mərhələsinə start verilir.

Hər iki qrup üzrə həmyerlilərimiz yarışır. Kişilərin yarışında İlya Qrişunin, qadınların yarışında isə Svetlana Makştarova mübarizə aparacaq.

10:55

Batut gimnastikasında qaliblər məlum olub.

Kişilər arasında keçirilən final mərhələsində Rusiya idmançısı Dmitri Uşakov 60,090 xal toplayaraq qızıl müdalı qazanıb.

Belarusiyalı idmançı Uladzislau Hançarou 59,380 xalla ikinci piləni tutub.

Həmyerlimiz İlya Qrişunin 58,765 xalla bürünv medalı qazanıb.

12:05

Batut gimnastikası yarışlarında qadınlar arasında keçirilən sinxron hərəkətlər üzrə yarışların medalları öz sahiblərini tapıb.

Rusiyalı Anna Kornetskaya və Yana Pavlova cütlüyü hamıdan güclü olub. 46,400 xal toplayan şimal qonşumuzun təmsilçiləri I Avropa Oyunlarının qızıl medalına layiq görülüb.

İkinci yeri 44,600 xalla Fransa, üçncü yeri isə 44,500 xalla Portuqaliya idmançıları qazanıb.

12:28

Batut gimnastikası üzrə kişilər arasında sinxron hərəkətlər yarışlarının medalçıları məlum olub.

Gimnastikanın digər növündə də qızıl medalı əldən verməyən rusiyalı gimnastlar – Dmitri Uşakov və Mixail Melnik bu dəfə də fəxri kürsünün ən yüksək pilləsinə qalxıblar. Cütlük 51,100 xal toplamaqla I Avropa Oyunlarının baş mükafatını qazanıb.

Gümüş medal isə Belarus idmançılarına nəsib olub. Uladzislau Hançarou və Mikalai Kazakdan ibarət cütlük liderdən cüzi fərqlə geridə qalıb – 50,800 xal.

Martin Qromovski və Kirilo Sonndan ibarət alman cütlük isə 48,800 xal toplamaqla turnirin bürünc mükafatını qazanıb.

15:40

Akrobatika gimnastikası yarışlarında qarışıq cütlük üzrə temp hərəkətlərinin qalibləri məlum olub.

Axar.az xəbər verir ki, Rusiyanın Marina Çernova və Georgi Pataraya cütlüyü 29,300 xal toplayaraq turnirin qızıl medalını qazanıb.

İkinci yeri 28,690 xalla Almaniya təmsilçiləri, Yana Vastavel və Solano Kassamayor tutub. Bürünc medalı isə Hannah Baughn və Ryan Bartlettdən ibarət Britaniya cütlüyü qazanıb.

Bu yarışda təmsilçilərimiz Ulyana Diakova və Anatoliy Leonov 27,320 xal toplamaqla yalnız Bolqarıstan idmançılarını geridə qoymağı bacarıblar.

17:33

Akrobatika gimnastikası yarışlarında qadınlar arasında qrup - balans hərəkətləri üzrə final yarışı keçirilib.

Bu yarışda 28,700 xalla Belçika təmsilçiləri 1-ci, 28,550 xalla Rusiya təmsilçiləri 2-ci, 28,510 xalla Belarus idmançıları 3-cü olub.

***

Bədii gimnastika yarışlarında qrup gürzlər və halqalar üzrə final qarşılaşması keçirilib.

17,600 xalla Belarus təmsilçiləri birinci olub. 17,500 xal toplayan İsrail komandası 2-ci, 17,150 xal toplayan Ukrayna komandası isə 3-cü olub.

***

Bədii gimnastika yarışlarında fərdi top üzrə final qarşılaşması keçirilib.

18,950 xal toplayan Rusiya gimnastı Yana Kudryavtseva birinci olub.

Ukrayna təmsilçisi Qanna Rizatdinova 18,250 xalla ikinci, belarus gimnastı Melitina Staniouta isə 18,200 xalla 3-cü olub.

18:34

Akrobatika gimnastikası üzrə qarışıq cütlük - balans hərəkətləri yarışlarının final görüşü keçirilib.

Gözlənildiyi kimi, rusiyalı gimnastlar – Marina Çernova və Georgi Pataraya 29,760 xal toplayaraq I Avropa Oyunlarının qızıl medalını qazanıblar.

Yana Vastavel və Solano Kassamayordan ibarət Belçika yığması isə 28,930 xal toplayaraq ikinci olub.

Böyük Britaniya gimnastları – Hannah Baughn və Ryan Bartlet isə 28,260 xalla bürünc medalı qazanıb.

Həmyerlilərimiz Ulyana Diakova və Anatoliy Leonov 24,580 xalla ən axırıncı yeri tutub.

19:31

Bədii gimnastika üzrə fərdi lent yarışlarının qalibləri bəlli olub.

Axar.az xəbər verir ki, 19,000 xal toplayan Rusiya idmançısı Yana Kudryavtseva qızıl medalı qazanıb. Həmyerlimiz Marina Durunda 18,200 xal toplamaqla gümüş medalı, Gürcüstan idmançısı Salome Pazhava isə 17,950 xalla bürünc medalı qazanıb.