Bu gün Bakı-2015 Birinci Avropa Oyunlarında boks yarışlarının 1/8 final mərhələsinə yekun vurulacaq.

Axar.az xəbər verir ki, 1/4 finala gedən yolda daha 5 çəkidə döyüşlər baş tutacaq.

Bunun dördündə kişi, birində qadın boksçular mübarizə aparacaqlar. Azərbaycan yığmasının üzvləri bu gün keçiriləcək bütün çəki dərəcələrində rinqə çıxacaq.

Boks

21 iyun

Kişilər

64 kq

1/16 final mərhələsində slovakiyalı Edin Seydinoviçi mübarizədən kənarlaşdıran Lorenzo Sotomayor bu dəfə moldovalı Dmitri Qalaqotu sınağa çəkəcək. Kuba əsilli boksçumuzla Avropa çempionatının mükafatçısının görüşü saat 20:30-a təsadüf edəcək.

69 kq

Mübarizəyə bu gündən qoşulacaq Pərviz Bağırovu 1/8 finalda ciddi sınaq gözləyir. 21 yaşlı boksçumuz əvvəlki döyüşündə Anas Messaudini məğlub edən London 2012-nin iştirakçısı olmuş moldovalı Vasili Belusla qarşılaşacaq. Avropa çempionumuz rinqə saat 14:15-də çıxacaq.

75 kq

Bu çəkidə Azərbaycanı təmsil edəcək Xaybula Musalov ilk qarşılaşmasını fransız Kristian Haller-Assomo Mbilliyə qarşı keçirəcək. 1/16 finalda moldovalı Avropa üçüncüsü Viktor Çarapçevşiyə qalib gələn 20 yaşlı idmançı ilə döyüş saat 21:00-da olacaq.

91 kq

Azərbaycan boksçusu Abdulqadir Abdullayev macarıstanlı Adam Hamori ilə gücünü yoxlayacaq. Təmsilçimiz 1/16 finalda slovakiyalı Erik Tlkaneçi mübarizədən kənarlaşdıran rəqiblə saat 15:30-da döyüşəcək.


Qadınlar

60 kq

Qadın boksçularımızdan Yana Alekseyevna 1/8 finalda kifayət qədər təcrübəli finlandiyalı Mira Potkonenlə üz-üzə gələcək. 27 yaşlı idmançımız özündən 7 yaş böyük olan rəqiblə saat 13:30-da münasibətinə aydınlıq gətirəcək.

Qeyd edək ki, Azərbaycan millisinin boksçularından Tayfur Əliyev (56 kq), Teymur Məmmədov (81 kq), Məhəmmədrəsul Məcidov (+91 kq), Elvin Məmişzadə (52 kq) və Albert Səlimov (60 kq) artıq adını 1/4 finala yazdırıb. Həmçinin, Salman Əlizadə (49 kq), Anna Əlimərdanova (54 kq) və Yelena Vıstropova (64 kq) da yarışa bu mərhələdən başlayacaq.

13:47

Yana Alekseyevna 1/8 finalda kifayət qədər təcrübəli finlandiyalı Mira Potkoneni 3-0 hesabı ilə məğlub edərək dörddəbir finala yüksəlib.

14:33

Kişilər arasında yarım-orta çəki (69kq) dərəcəsində azərbaycanlı boksçu Pərviz Bağırov moldovalı Vasili Belousla qarşılaşıb. Gərgin keçən döyüş boksçumuzun 3-0 hesablı qələbəsi ilə başa çatıb.

16:50

Azərbaycan boksçusu Abdulqadir Abdullayev ilk cəhdində macarıstanlı Adam Hamori ilə gücünü yoxlayıb.

Təmsilçimiz 1/16 finalda slovakiyalı Erik Tlkaneçi mübarizədən kənarlaşdıran rəqibi asanlıqla mübarizədən kənarlaşdırıb. O, hər 3 raunda Hamoridən güclü olub - 3:0 (30:25; 30:27; 20:25).

A. Abdullayev 1/4 finalda Raul Omba Bionqolo (Fransa) ilə üz-üzə gələcək. Görüş iyunun 23-də saat 21:30-da olacaq.

18:55

Kişilər arasında birinci yarım-orta çəki (64kq) dərəcəsində boks yarışları davam edir.

Azərbaycan təmsilçisi Kollazo Sotomayor yarımfinal uğrunda moldovalı idmançı Dmitri Qalaqotla döyüşəcək.

20:48

Azərbaycan təmsilçisi Kollazo Sotomayor moldovalı rəqibi Dmitri Qalaqotu 3-0 hesabı ilə məğlub edərək yarımfinala yüksəlib.

21:25

Boks üzrə kişilər arasında orta çəki (75kq) səkkizdəbir finalın növbəti görüşü keçirilib.

Azərbaycan boksçusu Xaybulla Musalov fransalı rəqibi Mbilli Assomo-Hallıer Christianı 3-0 hesabı ilə məğlub edib.

Bu qələbə nəticəsində boksçumuz növbəti mərhələyə adlayıb.