Bu gün Avropa Oyunlarının boks yarışlarının 1/4 final mərhələsi 8 çəki dərəcəsində keçiriləcək görüşlərlə davam edəcək.

Axar.az xəbər verir ki, 4 kişi, 2 qadın olmaqla millimizin 6 idmançısı növbəti mərhələ uğrunda mübarizə aparacaq.

Kişilər

60 kq çəki dərəcəsində Albert Səlimov bolqarıstanlı Dmitri Elianla üz-üzə gələcək. Görüş saat 14:00-da başlayacaq.

64 kq çəki dərəcəsində təmsilçimiz Lorenzo Sotomayor 1/4 finalda rumın Daniel Nikulesku ilə görüşəcək. Qarşılaşma 20:15-də start götürəcək.

69 kq çəki dərəcəsində Pərviz Bağırov 1/4 finalda almaniyalı Abass Barau ilə qarşılaşacaq. Boksçular saat 21:15-də üz-üzə gələcəklər.

91 kq çəki dərəcəsində Abdulqadir Abdullayev fransız Pol Bionqolo Omba ilə gücünə aydınlıq gətirəcək. Boksçular rinqə 21:30-da çıxacaqlar.

Qadınlar

54 kq çəki dərəcəsində Anna Əlimərdanova yarımfinala vəsiqə qazanmaq üçün bolqar Stanimira Petrova ilə görüşəcək. Qarşılaşma 12:45-də başlayacaq.

64 kq çəki dərəcəsində boksçumuz Yelena Vıstropova britaniyalı Rayan Sandi ilə qarşılaşacaq. Görüş saat 19:15-də start götürəcək.

12:57

Anna Əlimərdanova yarımfinala vəsiqə qazanmaq üçün bolqar Stanimira Petrova ilə görüşüb. O, rəqibinə 3-0 qalib gəlib.

***

Əlimərdanova iyunun 25-də yarımfinalda rus Yelena Saveleva ilə görüşəcək. Qarşılaşma saat 12:30-da başlayacaq.

14:14

Albert Səlimov bolqarıstanlı Dmitri Elianla üz-üzə gəlib. O, rəqibinə 3-0 qalib gəlib və yarımfinala yüksəlib.

19:30

64 kq çəki dərəcəsində boksçumuz Yelena Vıstropova britaniyalı Rayan Sandi ilə qarşılaşıb. Görüş təmsilçimizin 2-1 hesablı məğlubiyyəti ilə başa çatıb.

20:30

64 kq çəki dərəcəsində təmsilçimiz Lorenzo Sotomayor 1/4 finalda rumın Daniel Nikuleskunu 3-0 məğlub edərək növbəti mərhələyə yüksəldi.

21:37

69 kq çəki dərəcəsində Pərviz Bağırov 1/4 finalda almaniyalı Abass Barau ilə qarşılaşdı və rəqibini 3-0 məğlub etdi. Bağırov 1/2 finalda yarışacaq.

21:52

91 kq çəki dərəcəsində Abdulqadir Abdullayev fransız Pol Bionqolo Omba ilə görüşdə inamlı qələbə qazandı 3-0.

Qeyd edək ki, dünən keçirilən 1/4 final qarşılaşmasında 4 boksçumuz növbəti mərhələyə yüksəlmişdi. Bu gün isə daha 5 boksçumuz növbəti mərhələyə yüksəlməklə bürünc medalı təmin edib.