"Oyunlar ərəfəsində peşəsindən asılı olmayaraq avtomobil idarə edən sürücülər və gecə-gündüz yollarda, ən kəskinlər istidə belə, öz vəzifə borcunu yerinə yetirən polislər xüsusi olaraq qeyd edilməlidir".

Axar.az xəbər verir ki, bu barədə deputat Fazil Mustafa yazıb. Millət vəkili bütün sürücülərin Avropa Oyunları ilə əlaqəli yol hərəkətində tətbiq edilən qaydaları pozmağa görə ödəməli olduğu cərimələrin ləğv edilməsini təklif edib:

"I Avropa Oyunların təşkilində, ölkənin imicinin formalaşmasında müxtəlif təbəqələrdən çox sayda vətəndaşımızın xidməti oldu. Bu vətəndaşların içində peşəsindən asılı olmayaraq avtomobil idarə edən sürücülər və gecə-gündüz yollarda, ən kəskin istidə belə, öz vəzifə borcunu yerinə yetirən polislər xüsusi olaraq qeyd edilməlidir. Şəhərə giriş-çıxışın məhdudlaşdırılması, qadağanedici zolaqların tətbiqi ən çox sürücülər üçün narahatlıq yaradırdı. Ancaq sürücülərin əksəriyyəti əslində böyük fədakarlıq göstərdilər, qaydalara əməl edərək yarışlarda daşınmaların normal tənzimlənməsinə yardım etdilər. Avropa Oyunlarında uğurlarımızı və sürücülərin əksəriyyətinin intizamlı davranışını nəzərə alaraq, Oyunlar ərəfəsində və Oyunlar zamanı qadağanedici zolaqlarda hərəkətə görə inzibati məsuliyyət çərçivəsində sürücülərə qarşı başladılan bütün inzibati icraat işləri dayandırılsın, daha anlaşılan dillə desək, bütün sürücülərin Avropa Oyunları ilə əlaqəli yol hərəkətində tətbiq edilən qaydaları pozmağa görə ödəməli olduğu cərimələr ləğv edilsin. Ümid edirəm ki, Daxili İşlər Nazirliyi bu məsələyə anlayışla yanaşacaq və sürücülərə qarşı xoşməramlı bir addım atılacaq".