Ötən gün Bakı 2015 I Avropa Oyunlarının rəsmi bağlanış mərasimi keçirildi.

Axar.az xəbər verir ki, Bakı Olimpiya Stadionunda baş tutan bağlanış mərasimi möhtəşəmliyi ilə dünyanı heyran edib.

Dünyanın ən nüfuzlu KİV-ləri də I Avropa Oyunlarının bağlanış mərasimini canlı yayımlayıblar. Rusiyanın Gazeta.ru, Ukraynanın Obozrevatel.com kimi xəbər portalları isə yarışı ilk gündən bağlanış mərasiminə kimi anbaan tamaşaçılara çatdırıblar.

Qeyd edək ki, Olimpiya Stadionunun səhnəsində Qız qalası ucaldılıb, qalanın ən yüksək zirvəsindən İçərişəhərin divarları arxasında Simurq quşu əfsanəsində vəd edilən oyanışı gerçəkləşdirərək simasını dəyişən şəhər - Bakı, Alov Qüllələri görünüb. Bağlanış mərasimində şeypurun sədaları Azərbaycan Prezidenti İlham Əliyevi, Bakı-2015: I Avropa Oyunları Təşkilat Komitəsinin sədri, Azərbaycanın birinci xanımı Mehriban Əliyevanı və Avropa Olimpiya Komitəsinin sədri Patrik Hikkini salamlayıb. Bakıyadək bütün qədim məkanları diyar-diyar dolaşan xalça ilmələri stadionun ekranlarında canlanıb. Geriyə sayım sıfıra çatdığı an xor dövlət himnini yeni simfonik aranjimanda ifa edib və Azərbaycan bayrağı yüksəlib.