Bakı-2015 I Avropa Oyunları iyunun 28-də möhtəşəm bağlanış mərasimi ilə başa çatdı.

Axar.az xəbər verir ki, dünən keçirilən möhtəşəm bağlanış mərasimi Avropanın aparıcı media orqanları tərəfindən geniş işıqlandırılıb.

"Sportsmax.tv" idman portalı bağlanış mərasiminin möhtəşəmliyini qeyd edərək Bakı Olimpiya Stadionunda keçirilən tədbirə dünya şöhrətli ulduzların da qatıldığını vurğulayır. Məqalədə Avropa Olimpiya Komitəsinin prezidenti Patrik Hikkinin fikirləri də yer alıb: "Azərbaycanın gələcəyi parlaqdır. Avropa Oyunlarının gələcəyi parlaqdır. Bu cür mükəmməl təşkil edilən yarışlardan sonra Avropa Oyunlarının çox uzun bir tarixə malik olacağı qətidir".

Fransanın "ladepeche.fr" saytı birinci Avropa Oyunlarını xarakterizə edərək "Olimpiya Oyunlarının ideal surəti" ifadəsini işlədib.

Sayt Bakının Oyunların təşkili ilə digər böyük idman tədbirlərinə də ev sahibliyi etməyə qadir olduğunu sübut etdiyini yazıb:

"Təşkilatçılıq çox gözəl idi. Bakı iki il yarım ərzində 68 min nəfərlik Olimpiya Stadionu tikməklə böyük şücaət göstərib. Medallarda da Olimpiya halqaları təsvir olunmuşdu. Oyunlarda 12 min könüllü yüksək peşəkarlıq nümayiş etdirib. Yollarda yalnız akkreditasiyalı avtomobillərin istifadəsi üçün xüsusi xətt çəkilmişdi".

Məqalədə Avropa Olimpiya Komitəsinin prezidenti Patrik Hikkinin də Bakıda keçirilmiş oyunlarla bağlı fikirləri yer alıb. AOK prezidenti Oyunların yüksək səviyyədə keçdiyini və Azərbayanın Olimpiya Oyunlarına iddialı olduğunu bildirib.

Həmçinin qeyd olunub ki, hələlik 2024-cü il Olimpiya Oyunlarına ev sahibliyi məsələsi gündəmdə olmasa da, Azərbaycan 2016-cı ildə Formula 1 yarışlarına, 2017-ci ildə İslam Həmrəylik Oyunlarına və 2020-ci il futbol üzrə Avropa çempionatının bəzi oyunlarına ev sahibliyi edəcək.

Frans Press Agentliyi də iyunun 28-də ilk Avropa Oyunlarının təntənəli bağlanış mərasimi ilə bağlı geniş məqalə yayıb.

"Azərbaycanda keçirilən birinci Avropa Oyunları möhtəşəm bağlanış mərasimi ilə başa çatdı" sərlövhəli məqalədə müəllif "rəngli xoreoqrafiyalar, heyranedici atəşfəşanlıq Avropa Oyunları üçün ideal sonluq idi", - agentlik yazısında bildirib.

İdmançıların təəssüratlarını da qələmə alan məqalə müəllifi Oyunların mükəmməl təşkil edildiyini qeyd edib.

Agentlik məqalədə Avropa Olimpiya Komitəsinin prezidenti Patrik Hikkinin də fikirlərinə yer verib:

"Bakı Olimpiya Oyunları üçün hazırdır. İnfrastruktur və təşkilatçılıq qabiliyyəti Azərbaycana bu Oyunları keçirmək üçün imkan verir. Birinci Avropa Oyunları hər addımda gözləntilərimizə cavab verdi".

"Times of Malta" qəzetində Azərbaycanın ilk Avropa Oyunlarına uğurla ev sahibliyi etməsi ilə bağlı məqalə dərc olunub.

Məqalədə Azərbaycanın gənclər və idman naziri Azad Rəhimovun Bakı-2015 ilk Avropa Oyunları haqqında fikirlərinə yer verilib.

Nazir bildirib ki, Bakı-2015 vasitəsilə yeni idman mədəniyyəti formalaşıb. Əsas hədəflərimizdən biri də Azərbaycanın dünyada tanıdılması idi ki, artıq buna nail olunub.

Yazıda Avropa Oyunlarında Azərbaycanın 50 ölkə arasında medalların sayına görə ikinci yerdə qərarlaşdığı da qeyd olunub.

"Önəmli idman tədbirlərinə ev sahibliyi edən Azərbaycanda 2016-cı ildə Formula 1 Avropa Qran-prisi, Şahmat Olimpiadası, 2017-ci ildə IV İslam Həmrəylik Oyunları, 2020-ci ildə futbol üzrə Avropa çempionatının final mərhələsinin dörd oyunu keçiriləcək" – yazıda bildirilib.

Məqalədə, həmçinin Bakı-2015 ilk Avropa Oyunları Əməliyyat Komitəsinin əməliyyatlar üzrə baş direktoru Saymon Kleqin Azərbaycan idmançılarının yarışlardakı uğurlu çıxışları barədə fikirləri yer alıb.

Rusiya mətbuatı birinci Avropa Oyunlarının gedişi ilə yanaşı, bağlanış mərasimini də geniş işıqlandırıb.

Rossiya-24 telekanalı ilk Avropa Oyunları ilə bağlı yekun videomaterial hazırlayıb.

Süjetdə yarışların sonuncu günündə də idmançıların fəal iştirak etdiyi vurğulanır. Həmçinin rusiyalı idmançıların da üstünlüyü qeyd olunur.

Bağlanış mərasiminə də toxunan müxbir birinci Avropa Oyunlarının əsl bayram və dostluq əhval-ruhiyyəsində keçdiyini vurğulayır. Bildirilir ki, bağlanış mərasimində milli elementlərin də əks olunması böyük maraq doğurub.

"Azərbaycan böyük idmanla qısa müddətə olsa da vidalaşır. Amma yaxın vaxtlarda dünya Bakının təqdimatında Formula 1 və futbol üzrə Avropa çempionatının yarışlarını izləyəcək", - videomaterialda qeyd olunur.