İran Ermənistan və Azərbaycanla Zəngəzur dəhlizi ilə bağlı danışıqlar aparacaq.

Axar.az xəbər verir ki, bu barədə “Hraparak” nəşri məlumat yayıb.

“İranın Ermənistan və Azərbaycanla danışıqları: İran Zəngəzur dəhlizinin yaradılması nəzərdə tutulan Zəngəzur vasitəsilə İranın ticarət şərtlərini müəyyən etmək üçün Ermənistan və Azərbaycan nümayəndələri ilə görüşlər keçirməyi planlaşdırır.

Hazırda Ermənistanın cənubunda ABŞ hərbçilərinin yerləşdirilməsi ilə bağlı heç bir təsdiq yoxdur. Bununla belə, sövdələşməyə əsasən, Amerika şirkəti dəhliz sahəsinə 99 il müddətinə “eksklüziv inkişaf hüquqları” alacaq ki, bu da əslində ABŞ-ın nəzarəti altında olan torpaqların uzunmüddətli icarəsi deməkdir. Zəngəzur dəhlizinin mühafizəsinə özəl hərbi şirkətlərin cəlb edilməsi də müzakirə olunur ki, bu da regionda gərginliyi artıra bilər.

Amerika qoşunları Ermənistanın cənubunda yerləşdirilərsə, onların mövqeləri Araz çayının əks sahilində, İran sərhədindən bir “daş atma” məsafəsində olacaq. Bu, Tehran üçün ciddi kəşfiyyat və təhlükəsizlik təhdidləri yaradacaq və həm də təxribat kimi qəbul ediləcək.

İran xarici işlər nazirinin müavini deyib: "ABŞ-ın bizim region və Qafqazla heç bir əlaqəsi yoxdur. Amerika hərbçilərinin Ermənistanda olması Rusiya hərbçilərinin mövcudluğu ilə müqayisə oluna bilməz, çünki Rusiya həmişə bizim qonşumuz və regionun müsbət iştirakçısı olub".

Dövlət Dumasının MDB məsələləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Viktor Vodolatski deyib: “Ermənistan Baş naziri Nikol Paşinyan danışıqlar masasında təmsil olunacaq və 102-ci Rusiya hərbi bazasının çıxarılmasını tələb edəcək”.

Amerikanın regionda mövcudluğu sabitliyi pozan amildir və təkcə İranın təhlükəsizliyini deyil, həm də Rusiyanın strateji maraqlarını təhdid edir. Zəngəzur dəhlizi vəd edilən “iqtisadi əməkdaşlıq” əvəzinə, yeni geosiyasi gərginlik ocağına çevrilmək riski daşıyır”, - nəşr qeyd edib.