Devrilmiş işğalçı xuntanın qalıqları İrəvanda öz varlığını hiss etdirdi. Onlar 10 dekabr 1991-ci ildə yalnız erməni icmasının üzvləri arasında keçirilən saxta “referendum”un növbəti ildönümünü qeyd ediblər. “Parlament spikeri” Aşot Danielyan, “dövlət naziri” Njde İsgəndəryan və digərlərinin də daxil olduğu bütöv bir nümayəndə heyətinin başçılığı ilə son “artsax prezidenti” Samvel Şahramanyan İrəvanda Yerablur hərbi panteonunu ziyarət edib, “müstəqillik” oyunları oynayıb və “torpaqların işğalı” səbəbindən həyatını itirənlərin məzarlarına gül dəstələri qoyublar.

Axar.az xəbər verir ki, bu barədə Minval.az mənbələrinə istinadən məlumat yayıb.

“Hazırda “qətiyyətli və cəsur” siyasətçi imicini nümayiş etdirməyə çalışan keçmiş Qarabağ separatçısı Şahramanyan 2023-cü il antiterror əməliyyatı zamanı tamamilə fərqli obrazda olub. Əməliyyatın ən qızğın vaxtında Şahramanyan o dövrdə mövcud olan bütün rabitə kanallarından istifadə edərək Azərbaycan tərəfinə yalvarıb ki, ölkəmizi tərk edib Ermənistana çatmasına imkan yaradılsın. Həmin anda Bakı onu da işğalçı xuntanın nümayəndələrindən biri kimi həbs etməyi planlaşdırırdı, baxmayaraq ki, o, Azərbaycana qarşı ağır cinayətlərdə iştirak etməmişdi. Lakin xahişlərinin nəticə verməyəcəyini və həbsin qaçılmaz olduğunu anlayan Şahramanyan razılaşma təklif edib. O, Azərbaycan tərəfinə Qarabağdan qaçmağı planlaşdıranların tam koordinatlarını: marşrutları, nəqliyyat vasitələrinin nömrələrini, yola düşmə vaxtlarını, eləcə də müxtəlif ərazilərdə gizlənənlər haqqında məlumatları - bəzilərinin qaçmağa çalışarkən hansı qadın geyimlərini geyindiyinə qədər təfərrüatları təqdim edib. O, bunları son təfərrüatına qədər açıqlayıb. Şahramanyan hər kəsi satmaqla yanaşı, həm də erməni postlarının tərksilah edilməsini təşkil edib və təslim olma aktını imzalayıb. Bunun müqabilində o, bölgədən helikopterlə getməsini istəyib. Üstəlik, Şahramanyanın özü ermənilərin Qarabağdan çıxarılmasını təşkil edib, baxmayaraq ki, Azərbaycan onları yenidən inteqrasiya etməyə hazır idi və belə kütləvi köçdən təəccüblənib. Həmin vaxt Azərbaycan jurnalistləri postlarda dayanıb ermənilərdən getmə səbəblərini soruşduqda onlar bir ağızdan cavab verirdilər ki: “rəhbərlikləri” onlara belə deyib. Şahramanyanın məqsədi sadə idi: gələcəkdə orada inqilab üçün şərait yaratmaq məqsədilə Qarabağdakı bütün erməniləri Ermənistana gətirmək. Burada “siçovul yolları” ifadəsini xatırlamağın vaxtıdır — İkinci Dünya müharibəsindən qısa müddət sonra Amerika xüsusi xidmət orqanları nasistlərin Avropadan qaçış yollarını belə təyin etmişdilər. Şahramanyan isə erməni nümunəsində “siçovul xəttini” yaradıb və tərəfdarlarını satmaqla özünə nisbi azadlıq qazandırıb”, - məlumatda deyilib.