“Beynəlxalq sülh və rifah üçün Tramp marşrutu” (TRİPP) proqramı tədricən Rusiyanı Cənubi Qafqazda əsas oyunçu mövqeyindən məhrum edir.

Axar.az xəbər verir ki, bu barədə Ukrayna Xarici Kəşfiyyat Xidmətinin məlumatında bildirilib.

“Ən azı 49 il ərzində Ermənistan–ABŞ birgə idarəetmə şirkəti layihənin fəaliyyətini və keçmiş rəqiblər arasında kommunikasiyanı təmin edəcək. Son vaxtlara qədər Moskva regionda əsas və yeganə vasitəçi kimi çıxış edirdi.

TRİPP çərçivəsində İranla sərhəd boyunca uzanan dəmir yolu xətti boyunca neft və qaz kəmərlərinin, optik lifli şəbəkələrin çəkilməsi, eləcə də dəmir yolu və avtomobil yolu infrastrukturunun yaradılması planlaşdırılır. Bu dəhliz Çin, Qazaxıstan, Xəzər dənizi, Azərbaycan, Gürcüstan və daha sonra Türkiyə və Avropa ölkələrindən keçən Transxəzər marşrutunun “vacib həlqəsi” olacaq.

Ermənistanın xarici işlər naziri Ararat Mirzoyanın sözlərinə görə, layihədə Rusiyanın iştirakı ABŞ və Ermənistan tərəfindən ümumiyyətlə müzakirə olunmayıb.

Eyni zamanda, Ermənistanın Baş naziri Nikol Paşinyan hazırda Ermənistan dəmir yollarının konsessiyaçısı olan “Rusiya Dəmir Yolları” ASC-yə demək olar ki, ultimativ müraciət edərək Azərbaycan və Türkiyə sərhədlərinə qədər dağıdılmış dəmir yolu xətlərinin tez bir zamanda bərpasını təklif edib. Əks halda, bu işlər Ermənistanın hesabına həyata keçiriləcək ki, bu da Rusiyanın regiondakı mövcudluğunun məqsədəuyğunluğunu sual altına qoyacaq”, – məlumatda qeyd olunur.