19:18

Bu gün Bakıda Milli Gimnastika Arenasında 42-ci Ümumdünya Şahmat Olimpiadasının açılış mərasimi keçirilir.

Axar.az xəbər verir ki, mərasimdə Azərbaycan Prezidenti İlham Əliyev və xanımı Mehriban Əliyeva iştirak edirlər.

Bakı Şahmat Olimpiadasında iştirak etmək üçün 176 ölkə qeydiyyatdan keçib. Ümumilikdə çempionluq uğrunda 181 kişi və 142 qadın komandası mübarizə aparacaq. Bu, iştirakçı ölkələrin sayına görə Olimpiada tarixində rekord göstərici sayılır.

11 turdan ibarət yarışlar sentyabrın 13-də yekunlaşacaq. İlk tur sentyabrın 2-də saat 15:00-da start götürəcək. Sentyabrın 7-də yarışda istirahət günüdür.

Azərbaycan Olimpiadada üç kişi və üç qadın komandası ilə təmsil olunacaq.

Olimpiada günlərində Bakı həm də FİDE-nin növbəti konqresinə ev sahibliyi edəcək. Həmin konqresdə isə 183 ölkə təmsil olunacaq.

Bakı Şahmat Olimpiadasında kişilərin yarışında ən yüksək reytinq Rusiya millisinə məxsusdur. Onların əmsalı 2760-a bərabərdir. ABŞ (2740) ikinci, Çin (2735) üçüncü pillədə qərarlaşıb. Azərbaycanın I komandası isə 2705 xalla 4-cüdür. İkinci komandamız 2576, üçüncüsü isə 2350 xala malikdir.

142 komandanın çıxış edəcəyi qadınların turnirində isə reytinq-favorit Çin millisidir - 2528. İkinci pilləni Rusiya (2493), üçüncü yeri Ukrayna (2485) tutur. Azərbaycanın I komandası 2320 reytinq xalına malikdir. İkinci komandamız 2248, üçüncüsü isə 2016 xala malikdir.

Qeyd edək ki, sentyabrın 1-dən 14-dək Bakıda keçiriləcək 42-ci Ümumdünya Şahmat Olimpiadası çərçivəsində Bakı Kristal Zalında Rusiyanın Şahmat Muzeyi tərəfindən sərgi də təşkil olunacaq. Sərgidə hind çaturanqa, İran satranc oyunları üçün dəst, Luis adasında morj dişindən düzəldilən şahmat dəsti, Kral I Çarlz üçün fil sümüyündən hazırlanan orta əsrlərə aid şahmat dəsti, buryat şahmat dəsti və digər çoxsaylı eksponatlar nümayiş etdiriləcək.

***

Bakıda 42-ci Ümumdünya Şahmat Olimpiadasının təntənəli açılış mərasimi keçirilib.

Axar.az xəbər verir ki, mərasimdə Azərbaycan Prezidenti İlham Əliyev, xanımı Mehriban Əliyeva və ailə üzvləri, Dünya Şahmat Federasiyasının (FIDE) prezidenti Kirsan İlyumjinov və təşkilatın digər nümayəndələri, şahmat üzrə dünya çempionları, dövlət və hökumət rəsmiləri iştirak ediblər.

Bakı Şahmat Olimpiadasının Təşkilat Komitəsinin sədri, Azərbaycanın Baş nazirinin birinci müavini Yaqub Eyyubov mərasimdə çıxış edib.

Sonra FİDE-nin prezidenti Kirsan İlyumjinov çıxış edib.

Daha sonra Azərbaycan Prezidenti İlham Əliyev 42-ci Ümumdünya Şahmat Olimpiadasını açıq elan edib.

Sonra püşkatma keçirilib. Olimpiadanın baş hakimi, Azərbaycan Şahmat Federasiyasının vitse-prezidenti Faiq Həsənov iştirakçıların siyahısında sıra nömrələri cüt olan yığma komandalar sırasında oyunun hansı fiqurla başlanacağını müəyyən edib.

Mərasim Azərbaycan estradasının beş populyar nümayəndəsinin improvizə edilmiş caz, rok və muğam sintezinin ifası ilə başa çatıb.

Ümumdünya Şahmat Olimpiadasının işıqlandırılması üçün 250-dən çox yerli və xarici media nümayəndəsi qeydiyyatdan keçib.

Mötəbər yarışın idarə olunmasına Azərbaycandan 30 hakim cəlb edilib.

İlk tura sentyabrın 2-də start veriləcək. On bir turdan ibarət yarışlar sentyabrın 13-də yekunlaşacaq.