"Xural" qəzetinin baş redaktoru Əvəz Zeynallının Binəqədi Rayon Polis İdarəsinin 4-cü Polis Bölməsinə çağırılması haqda yaydığı məlumata Bakı şəhər Baş Polis İdarəsindən cavab verilib.

BŞBPİ-nin mətbuat xidmətindən Axar.az-a verilən məlumatda bildirilir ki, vətəndaş Əvəz Zeynallı həqiqətən də sentyabrın 3-də 4-cü Polis Bölməsinə dəvət olunub.

"Məsələ ondadır ki, bölmədə yeni polis sahə inspektoru təyin olunan Nadir Abbasov ərazidə yaşayan, cəzaçəkmə müəssisələrində cəza çəkmiş vətəndaşlarla görüşmək, tanış olmaq, profilaktik söhbət aparmaq istəyib. Əvəz Zeynallı da yalnız bu məqsədlə bölməyə dəvət olunub.

Xüsusi olaraq vurğulamaq istərdik ki, söhbət normal iş şəraitində keçib, Zeynallıya qarşı hər hansı qeyri-qanuni, qeyri-etik ifadələr işlədilməyib, mərhum jurnalistlər Nəcəf Nəcəfovun və Elmar Hüseynovun adları çəkilməyib", - Bakı polisinin yaydığı məlumatda bildirilir.