Sentyabrın 21-də Prezident Administrasiyasının qanunvericilik və hüquq ekspertizası məsələləri şöbəsinin müdiri Şahin Əliyev Venesiya Komissiyasının "Azərbaycan Respublikasının Konstitusiyasında dəyişikliklər edilməsi haqqında" Azərbaycan Respublikasının Referendum Aktının layihəsinə dair ilkin rəyi ilə bağlı mətbuat konfransı keçirib.

Axar.az xəbər verir ki, Venesiya Komissiyasının rəyində kifayət qədər qeyri-dəqiqliklərin və kobud səhvlərin olduğunu deyən Şahin Əliyev bildirib ki, rəyin 25-ci bəndində Azərbaycan Konstitusiyasının 159-cu maddəsinə istinad edilir. Halbuki bizim konstitusiya 158 maddədən ibarətdir.

Prezident Administrasiyasının şöbə müdiri bildirib ki, Komissiya tərəfindən Referendum Aktı layihəsinin insan hüquqları ilə bağlı məğzi dəstəklənir. Ş.Əliyev deyib: "Onların əsas narazılıqları icra hakimiyyəti şaqulisinin möhkəmləndirilməsi ilə bağlıdır. Söhbət Referendum Aktı qəbul ediləcəyi təqdirdə təsis ediləcək vitse- prezidentlər institutundan gedir. Əsas arqument ondan ibarətdir ki, təyinatlı vitse-prezidentlər institutu demokratik standartları pozur. Əgər normal müzakirələr keçsəydi, bizim rəyimiz öyrənilsəydi onlara sual vermək olardı ki, bu demokratik standartlar harada mövcuddur. Hansı beynəlxalq sənəddə, hansı aktda bu, əksini tapıb. Belə demokratik standartlar mövcud deyil".