Xəzəryanı dövlətlərin Xarici İşlər nazirləri bu gün Xəzər dənizini xarici dövlətlərin təsirindən qorumaq, üçüncü ölkənin burada hərbi qüvvələrini yerləşdirilməsinin qarşısını almaqla bağlı hazırlanacaq konvensiyanı müzakirə edəcəklər.

"Axar.az" xəbər verir ki, belə bir iddia ilə Rusiyanın "Kommersant" qəzeti çıxış edib.

Qəzet bildirib ki, sözügedən konvensiyanı nazirlər elə konfrans zamanı paraflayacaqlar.

"Moskva öz partnyorlarını inandırıb ki, heç bir xarici güc Xəzərə təsir edə bilməz. Əlbəttə ki, burada söhbət ilk növbədə ABŞ-ın hərbi qüvvələrini Xəzərdə yerləşdirmək istəməsindən gedir" deyə qəzet yazıb.

Qeyd edək ki, bu gün Moskvada keçiriləcək iclasda Rusiya Xarici İşlər naziri Sergey Lavrov, Qazaxıstan Xarici İşlər naziri Erlan İdrisov, İran Xarici İşlər naziri Məhəmməd Cavad Zərif, Türkmənistan Xarici İşlər naziri Rəşid Meredov və Azərbaycan Xarici İşlər naziri Elmar Məmmədyarov iştirak edəcək.

Bugünkü iclas Xəzəryanı dövlətlərin payızda keçiriləcək Həştərxan sammitinə hazırlıq xarakteri daşıyır.