Azərbaycan ordusuna ləkə vurmaq istəyən qüvvələr, bəzi KİV-lər həqiqətə uyğun olmayan, dövlət təhlükəsizliyimizə xələl gətirən müxtəlif məlumatlar və məqalələr dərc edirlər.

Axar.az Report-a istinadən xəbər verir ki, bunu baş prokuror Zakir Qaralov deyib. O bildirib ki, artıq 6 KİV-ə Baş Prokurorluq tərəfindən rəsmi xəbərdarlıq edilib:

"Bütün KİV-ləri bu məlumatların işıqlandırılmasından çəkindirməyə çağırıram. Azərbaycan dövləti müharibə şəraitində yaşayır. Heç kəsin ixtiyarı yoxdur ki, Azərbaycan ordusuna, onun hərbi qüdrətinə, orduda xidmət edən qeyrətli azərbaycanlı balalarımıza ləkə vuraraq xələl gətirsin. İstənilən hallar mövcud ola bilər, ancaq dövlətin qurumları bunun qarşısını alıblar. Dövlətimiz və hərbi qüdrətimiz üçün bu gün hər hansı bir təhlükə yoxdur".

Baş prokuror özünü müxalifət adlandıran, heç bir hüquqi qeydiyyatdan keçməyən həmin siyasi partiyaların aldığı qrantlar barədə məlumat vermədiklərini bildirib:

“Biz də məcbur olduq ki, bir sıra tədbirlər görək. Bu sahədə Azərbaycanda qanunvericilik təkmilləşib. Onlar hər hansı qeyri-qanuni yolla Azərbaycanda həmin pulları ala bilmirlər. Ona görə də digər ölklərdə hesablar açmaqla bunu həyata keçirirlər. Bu da qanunsuzdur”.

Z.Qaralov bu halların qarşısının tam ciddiliklə alındığını deyib: “Gələcəkdə də bu halların qarşısı alınacaq. Həmin yoldaşlara sual olunur, onlar 10 illərlə hər hansı bir qurumda işləməyərək cangüdənlər saxlayır, müxtəlif avtomobillər alılar. Onlar xarici səfərləri nəyin hesab edirlər? Həmin qüvvələr maliyyə hesabatları vermirlər”.