Ermənistan bu işğalçılıq əməllərinə son verməlidir və biz buradan həmin ölkənin rəhbərliyini buna son verməyə çağırırıq.

Axar.az xəbər verir ki, bu sözləri millət vəkili Qənirə Paşayeva İspaniyanın Barselona şəhərində keçirilən Krans Montana Forumunda “İpək Yolu potensialı və Aralıq dənizi, Orta Şərq və Afrika region ölkələri ilə əməkdaşlıq üzrə” beynəlxalq konfransda deyib.

Yaxasında Zəhranın fotosu ilə tədbirə qatılan və məruzə ilə çıxış edən millət vəkili bildirib ki, işğalçı Ermənistanın törətdiyi cinayətlərə beynəlxalq ictimaiyyət etiraz səsini yüksəltməlidir:

“Zəhranın qətlə yetirilməsi insanlığın faciəsidir. Ermənistanın Azərbaycan torpaqlarının 20 faizini hələ də işğal altında saxlaması və 1 milyon azərbaycanlı qaçqın və məcburi köçkünün evinə dönməsinə imkan verməməsi insanlığın faciəsidir”.

Qeyd edək ki, millət vəkili Qənirə Paşayeva Azərbaycanın İpək Yolu layihəsinə böyük önəm verdiyini deyərək ölkəmizin həyata keçirdiyi böyük enerji və nəqliyyat layihələrindən geniş danışıb.