Trampla heç kim işləmək istəmir, Ağ Ev sahibi komandasının üzvlərini əlcək kimi dəyişir.

Axar.az xəbər verir ki, bu sözləri politoloq Elxan Şahinoğlu Feysbuk hesabında yazıb:

“Amerikanın uzaq və yaxın siyasi tarixini pis bilmirəm, son 100 ildə bu ölkənin dövlət başçılarının siyasi kariyeralarına az-çox bələdəm. Bu biliklərimdən çıxış edərək Prezident Donald Trampın sözün həqiqi mənasında fenomen olduğu qənaətinə gəlirəm. Amerikanın ikinci belə prezidentini xatırlamıram. Onsuz da Ağ Evdə peşəkar qıtlığı var idi, olanlar da ya şefləriylə yola getmirlər, ya da öz aralarında didişir, mətbuat səhifələrində bir-birilərinə atmaca atırlar”.

E.Şahinoğlu Trampın prezidentliyinin 4 ilini çox çətinliklə başa çatdıracağını bildirib:

“Əgər başa çatdıracaqsa… Üzvü olduğu Respublikaçılar Partiyası da ondan üz döndərməyə yaxındır. Trampı dünyanın hansısa nöqtəsində yalnız hansısa uğurlu hərbi kampaniya xilas edə bilər. Ancaq Amerikanın son illər hansı hərbi kampaniyası uğurlu olub ki? İraqda və Liviyada diktatorları devirsələr də, bu ölkələr terrorizmin və məzhəb savaşlarının yuvalarına çevrildi. Əfqanıstana daxil oldular ki, Talibanı zərərsizləşdirsinlər, təşkilat bu günə qədər ölkənin əksər hissəsinə nəzarət edir”.