Azərbaycan Prezidenti İlham Əliyevin Davos İqtisadi Forumu çərçivəsində dünyanın aparıcı şirkətləri ilə həyata keçirdiyi görüşlər Azərbaycan iqtisadiyyatının inkişafı üçün çox əlamətdardır.

Bu sözləri Axar.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov deyib. Millət vəkili Davod İqtisadi Forumunun əhəmiyyətini xüsusilə qeyd edib:

“Azərbaycanın 2018-ci ildə Dünya İqtisadi Forumunun inklüziv inkişaf indeksində Litva, Macarıstandan sonra üçüncü yeri tutması bizim üçün çox önəmlidir, çünki bu, forumun göstəricisidir. Forum çəçivəsində müəyyən önəmli görüşlər keçirilir, ölkələrin iqtisadi vəziyyəti ilə əlaqədar analizlər aparılır, müəyyən dövlət və şirkət rəhbərləri ilə görüşlərdə investisiya proqramları müzakirə edilir. Azərbaycan islahatlar həyata keçirən bir dövlət olmaqla yanaşı, eyni zamanda, iri nəqliyyat mərkəzi və neft-qaz ixrac edən ölkədir. Ölkəmiz maraqlı bir dövlət olduğu üçün hər il foruma dəvət alır”.

V.Əhmədov dövlət başçısının forum çərçivəsində həyata keçirdiyi görüşlərə də toxunub:

“Bu görüşlərdə əsas məqsəd ilk növbədə Azərbaycanı bir daha dünyaya geniş tanıtmaq, Dağlıq Qarabağ məsələsini diqqətə çatdırmaq, o cümlədən ölkəmizə investisiya yatırımı ilə bağlı məsələlərdə müəyyən anlaşılmazlıqları aradan qaldırmaqdır. Bu fonda dövlət başçısı iri şirkət rəhbərləri, hətta OPEK-in rəhbəri və bir sıra vitse-prezidentlərlə görüşüb”.