"Hazırda cəbhə xəttində vəziyyət Müdafiə Nazirliyi tərəfindən tam şəkildə idarə olunur, bütün məsələlər müdafiə naziri general-polkovnik Zakir Həsənovun tam ciddi nəzarəti altındadır. Ordumuz düşmənin istənilən hücumunu dəf etməyə, onu susdurmağa hazır və qadirdir və buna əməl də edir".

Bunu Trend-ə açıqlamasında Müdafiə Nazirliyinin şöbə rəisi polkovnik Elnur Məmmədov deyib.

Onun sözlərinə görə, müdafiə nazirinin göstərişinə əsasən, bütün cəbhə boyu Azərbaycan Silahlı Qüvvələri gücləndirilmiş iş rejiminə keçib və düşmənin bütün addımları diqqətlə izlənilir: "Mən özüm hazırda Tərtərin Qapanlı kəndindəyəm. Əslən də buralıyam. İndi məzuniyyətdəyəm və ailəmlə kənddə dincəlirəm. Evimiz də ön cəbhə xəttindən cəmi 250-280 metr aralıda yerləşir. Rayonda, kənddə ajiotaja səbəb ola biləcək heç nə yoxdur. Hər şey tam nəzarət altındadır. Vəziyyət normal şəkildə idarə olunur. Təsəvvür edin ki, mən Bakıdan gəlib burada ailəmlə dincəlirəm. Nəsə bir problem olsaydı, ailəm, uşaqlarım, anam burada olardımı?"

Şöbə rəisinin sözlərinə görə, ermənilər tərəfindən atəşkəsə əməl olunmur və Azərbaycan Silahlı Qüvvələrinin mövqeləri, o cümlədən kənd atəşə tutulur. Amma hər dəfə belə bir fakt olduqda Ordumuz tərəfindən düşmənin susdurulması üçün lazım olan bütün tədbirlər görülür: "Bu dəqiqələrdə hələ ki, heç bir atışma yoxdur. Lakin düşmən mövqelərimizi və ya kəndi atəşə tutarsa, qarşı tərəfin istifadə etdiyi silah növündən asılı olaraq ona cavab verilərək susdurulur. Hazırda yerləşdiyim istiqamət üzrə heç bir əlavə hərbi texnika cəlb olunmur. Çünki Ordumuzun hər bir istiqamət üzrə həm müdafiə olunmağa, həm də hücuma keçməyə gücü çata biləcək qədər döyüş texnikası, silahı, sursatı və şəxsi heyəti var".

Polkovnik E.Məmmədov qeyd edib ki, cəbhədə Silahlı Qüvvələrimizin texnika, silah-sursat və qidalanma ilə də bağlı heç bir problemi yoxdur: "Təminat ən yüksək səviyyədədir. Bir orduya ki, ölkə Prezidenti, müdafiə naziri şəxsən nəzarət edir, orada hansı çatışmazlıqdan söhbət gedə bilər? Hazırda bu kəndin özündə də 30 nəfərə yaxın şəxs müddətdən artıq xidmət edən hərbi qullquçu kimi Silahlı Qüvvələrdə xidmət edir və hər biri də maddi cəhətdən yüksək səviyyədə təmin olunur".

Müdafiə Nazirliyinin rəsmisi qeyd edib ki, cəbhədə idarə oluna bilməyəcək hal müşahidə edilmədiyindən onun məzuniyyətdən geri çağırılmasına ehtiyac duyulmayıb: "Mənim məzuniyyətdən geri, iş başına qayıtmağıma ehtiyac duyulmayıb. Axı elə bir səbəb də yoxdur ki, məzuniyyətdən geri çağırılım. Bilirsiniz ki, əgər orduda nəsə idarə olunmayan ciddi problem olarsa, onda ilk növbədə məzuniyyətdə, ezamiyyətdə olan hərbi qulluqçular geri çağırılır. İndiki şəraitdə buna heç bir ehtiyac yoxdur".

Cəbhə xəttində yaranmış gərgin vəziyyətdən təşvişə düşənlərə müraciət edən polkovnikin sözlərinə görə, hazırda bunun üçün heç bir səbəb yoxdur: "Azərbaycan xalqına demək istəyirəm ki, bu dəqiqə üçün narahat ola biləcək, ajiotaja səbəb ola biləcək heç nə yoxdur. Ordunun şəxsi heyəti arasında yüksək döyüş ruhu hökm sürür. İstər tağım, istər bölük, istər tabor olsun, verilən istənilən döyüş tapşırığını yerinə yetirməyə hazırdır. Yerli əhali də öz növbəsində, Orduya hərtərəfli dəstək verir və verəcək. Camaatın ordumuza inamı çox böyükdür. Bu inam olmasaydı, mən düşməndən cəmi 250 metr məsafədə ailəmlə istirahət edərdimmi? Mənim ailəmlə birgə kənddə bundan sonra hələ 15-20 gün də istirahət etmək fikrim var".