Hər kəsə məlum olan anklavlar Ermənistanın 29 743 kvadratkilometr ərazisinə daxil deyil. Artsvaşen (Başkənd) daxildir, lakin Sovet dövründən qalma anklavlar daxil deyil.

Axar.az xəbər verir ki, bunu Ermənistan Baş naziri Nikol Paşinyan "İnteqrasiya olunmuş təhlükəsizlik və dayanıqlılıq – 2026" beynəlxalq konfransında çıxışında deyib.

“Əgər Ermənistan suveren ərazisinin 29.753 kvadrat kilometr olduğunu deyirsə, deməli, başqasının hesabına beynəlxalq legitimlik çərçivəsindən 10 kvadrat kilometr kənara çıxır və ona qarşı tədbir görmək üçün legitimlik verir.

Ermənistan hakimiyyəti beynəlxalq legitimliyə əsaslanaraq, hər kəsi ölkəyə qarşı addımlar atmaq legitimliyindən məhrum edir.

Bu, möhkəm zəmanət deməkdirmi? Xeyr, elə deyil. Buna görə də hərtərəfli yanaşma vacibdir. Legitimlik birinci təbəqədir, ikincisi isə qarşılıqlı əlaqədir. Tez-tez deyirlər ki, Ermənistan çox şey edir, Azərbaycan isə etmir. Bu baxımdan ən açıq şey odur ki, Azərbaycan dəmir yolu hər iki istiqamətdə Ermənistan üçün açıqdır. Bu arada, Azərbaycan hazırda Ermənistan dəmir yolundan istifadə etmir. Buna görə də bu məntiqə görə, Azərbaycan dəmir yolu Ermənistan üçün açıq olmamalı idi”, - Paşinyan qeyd edib.

Onun sözlərinə görə, ordu suveren və beynəlxalq səviyyədə tanınmış sərhədi qorumaq üçün fəaliyyət göstərir və inkişaf edir.

O, bu məntiqdən yayınmanın Ermənistanın ciddi çətinliklərlə üzləşəcəyi və həssas vəziyyətə düşəcəyi bildirib, çünki başqalarının hərəkətləri üçün qanuni əsas yaradılacaq:

“Kərki haqqında söhbət bununla bağlıdır. Biz deyirik ki, Almatı Bəyannaməsi delimitasiya və demarkasiya məsələsində fundamental prinsipdir. Bu, Ermənistan Respublikası ərazisinin Ermənistan SSR ərazisi ilə tam eyniliyi deməkdir. Ermənistan hələ 2018-ci ildə ölkənin ərazisinin 29.743 kvadrat kilometr göstərildiyi “Torpaq Balansı haqqında” Qanunu qəbul etməzdən əvvəl bu ərazini tanıyırdı. Kərki anklavının olmadığını demək isə 29.743 kvadrat kilometr məntiqindən kənara çıxmaq deməkdir”.

Paşinyan Ermənistanın qlobal təchizat zəncirində iştirakını çox vacib hesab edib və bildirib ki, Ermənistanda nəsə baş versə, digər ölkələr özlərinin də əziyyət çəkəcəyini düşünsünlər:

“Ermənistan nəqliyyat əlaqələrinin blokadadan çıxarılması və TRİPP layihəsinin həyata keçirilməsi sayəsində belə bir əlaqəliliyə nail olmaq üçün unikal imkan əldə edib. Enerji texnologiyalarının inkişafı sayəsində Ermənistan enerji baxımından 100% özünü təmin edə biləcək”.