Milli komandamızın AVRO-2016-nın seçmə mərhələsinin ilk sınağında məğlubiyyəti xüsusi detalla yadda qalıb.

Axar.az xəbər ki, Bolqarıstanla matçda vurulan bütün qolların müəllifləri bolqarlar olub. Görüşdə hesabı rəqib komandanın oyunçusu İliyan Miçanski açsa da, cavab topunu yığmamızın milliləşdirdiyi bolqar Dmitri Nazarov vurub. Qəribə görünsə də, oyun öncəsi bu futbolçu ölkəsinin seçməsinə casusluqda ittiham edilirdi. Miçanski həmyerlisindən Azərbaycan komandası ilə bağlı müəyyən taktiki bilgilər əldə etdiyini açıqlamışdı. Ziddiyyətli görünsə də, qarşılaşmada qolların ikisini də məhz ittiham edən futbolçu və casus adlanan oyunçu vurdu.

Bunun bir təsadüf olduğunu düşünənlər də var. Lakin futboda bu cür təsadüflərə az rast gəlinir. Bu mübhəm və sirrli nəticənin pərdəarxası məqamları gec-tez açılacaq.

Qeyd edək ki, oyunda rəqibin qələbə topunu 87-ci dəqiqədə Ventsislav Xrisov qapımıza göndərib. Millimizin alman baş məşqçisi Berti Foqtsun bu dəfəki məğlubiyyətə isə izahı belə olub:

"10 gün ərzində futbolçularda fiziki hazırlığı yüksək səviyyəyə gətirə bilmərəm. Avrokuboklarda klubların oyunları təxirə salınır. Ona görə də bu qısa müddətə mən onların səviyyəsini qaldıra bilmərəm. Sözsüz ki, bu matçdan sonra işimiz çətinləşdi. Mən qələbə düşünmüşdüm. Amma belə olmadı".

Daha sonra Foqts mətbuat konfransını yarımçıq tərk edib. O, jurnalistin ona verdiyi "Rüfət Dadaşovdan nə gözləyirdiniz?" sualına almanca cavab verib və əsəbi şəkildə konfrans zalını tərk edib. Stadionda baş məşqçinin istefası tələbi ilə şüarlar səsləndirilib.