Qara Dəniz İqtisadi Əməkdaşlıq Təşkilatının əsas məqsədi üzv və qonşu ölkələr arasında əməkdaşlığa töhfə verməkdir. Təşkilatın yarandığı dövrün reallıqları tamamilə fərqli idi. Ona görə hazırkı fərqli tələblər qarşılığında çağırışlara cavab vermək lazımdır. Bu baxımdan təşkilat daxilində islahatların aparılması olduqca önəmlidir.

Axar.az xəbər verir ki, bu sözləri QDİƏT Baş katibi Maykl Kristides Qara Dəniz İqtisadi Əməkdaşlıq Təşkilatının Xarici İşlər Nazirləri Şurasının toplantısından sonra baş tutan mətbuat konfransında deyib.

Mətbuat konfransında çıxış edən digər bir qonaq Bolqarıstanın Xarici İşlər nazirinin müavini Emiliya Kraleva isə vurğulayıb ki, ölkəsi təşkilata sədrlik edəcəyi müddətdə üzv ölkələrlə Avropa İttifaqı arasında münasibətlərin inkişaf etdirilməsinə çalışacaq:

“Biz təşkilat çərçivəsində artıq başladılan islahatları davam etdirəcəyik. Energetika, kənd təsərrüfatı, mədəniyyət sahələrində əməkdaşlığımızı daha da inkişaf etdirmək niyyətindəyik".

Qeyd edək ki, yanvarın 1-dən QDİƏT sədrliyi Azərbaycandan Bolqarıstana keçəcək.