"Türkiyə Prezidenti Rəcəb Təyyub Ərdoğanın azərbaycanlı həmkarı İlham Əliyevi böyük iyirmilərin (G-20) 2015-c ilin noyabrında Antalyada keçiriləcək zirvə toplantısına dəvət etməsi Türkiyə-Azərbaycanı ittifaqının bir az daha güclənməsində və əsl regional gücə çevrilməsində önəmli addım sayıla bilər".

Axar.az xəbər verir ki, bu haqda politoloq Elxan Şahinoğlu öz fikirlərini bölüşüb.

Politoloq bunun sıradan bir hadisə olmadığını bildirib:

"Məsələ burasındadır ki, 2015-ci ildə G-20-yə Türkiyə sədrlik edəcək. Sədrlik edən dövlət üzv ölkələrdən başqa istədiyi bir dövləti bu tədbirə qonaq qismində dəvət etmək hüququna malikdir. 2013-cü ildə G-20-yə ev sahibliyini həyata keçirən Rusiya Qazaxıstanı, 2014-cü ildə Avstraliya isə Yeni Zelandiyanı seçmişdi. Türkiyə isə Azərbaycanı seçib. Azərbaycan qarşıdakı ildə qurumun bütün tədbirlərində iştirak edəcək. Dünya iqtisadiyyatının 95 faizi, ticarətin 85, əhalinin isə 2\3 hissəsi G-20 ölkələrində cəmləşib. Odur ki, belə bir kluba dəvət və kənardan da olsa, söz haqqına malik olmaq sıradan bir hadisə deyil. İl boyu G-20-lər çərçivəsində keçiriləcək tədbirlərdə dünya iqtisadiyyatının böyüməsindən və ticarət imkanlarının genişlənməsindən tutmuş enerji əməkdaşlığına qədər onlarla mövzu müzakirəyə çıxarılacaq və Azərbaycan bütün bu müzakirələrdə iştirak edəcək".

E. Şahinoğlu Türkiyə və Azərbaycan prezidentlərinin bu mövzunu telefonla dekabrın 1-də müzakirə etməsinə də diqqət çəkib:

"Eyni tarixdə Rusiya Prezidenti Vladimir Putin Türkiyəyə rəsmi səfər edib. Fikrimcə, bu, təsadüf deyil. Türkiyə və Azərbaycan prezidentləri telefon görüşməsində Dağlıq Qarabağ münaqişəsinin həlli yolları ilə bağlı məsələləri müzakirə ediblər. Bu isə o deməkdir ki, bu münaqişənin həlli Ankara üçün əvvəlki kimi prioritet qalır və məsələ Rusiya prezidentinin də diqqətinə çatdırılıb. Digər tərəfdən Azərbaycan prezidenti Dağlıq Qarabağ problemini və bunun regional əməkdaşlığa vurduğu ziyanı G-20-lərin zirvə toplantısında da gündəmə gətirmək imkanı qazanacaq".