Bu gün Bakı Apelyasiya Məhkəməsində hakim Qədim Babayevin sədrliyi ilə qalmaqallı məhkum Lamiyə Quliyevanın işi üzrə məhkəməyə hazırlıq iclası keçirilib.

Axar.az xəbər verir ki, məhkəmədə növbəti hazırlıq iclasının 20 fevral saat 12:30-a təyin edilməsi qərara alınıb.

L.Quliyevanın vəkili müvəkkili barəsindəki həbs qətimkan tədbirinin dəyişdirilməsi, məhkəmə müddətində ev dustaqlığına buraxılması barədə vəsatət qaldırıb. Lakin onun bu vəsatəti təmin edilməyib.

Məhkum L.Quliyeva məhkəmə iclası zamanı jurnalistlər vasitəsilə birbaşa xalqa müraciət edərək onu qınamamaqlarını və yardım etmələrini istəyib:

"Mən 15 yaşında bir cinayət törətmişəm. Məhv olmuşam və lazımi cəzamı çəkmişəm. Cəmiyyətin məni qınamamasını istəyirəm. Dövlətdən kömək istəyirəm".

Qeyd edk ki, L.Quliyeva məhkəmə binasına körpəsi ilə birlikdə gətirilib. Məhkəmədə Lamiyə Quliyevanın anası Kifayət Quliyeva da iştirak edib. Mediaya açıqlama verən K.Quliyeva məhkəmədən ədalətli qərar gözlədiyini və hazırda özünü pis hiss etdiyini deyib.

Xatırladaq ki, Baş Prokurorluq məhkum Lamiyə Quliyevanın 2010-cü ildə Cinayət Məcəlləsinin 317.2-ci maddəsi ilə olan məhkəmə hökmünün ağırlığına görə apellyasiya protesti və müddətinin bərpa olunması üçün vəsatət verib.