Ötən gündən Türkiyənin Manisa, Ankara şəhərlərində davamlı zəlzələlər baş verib. Əksər hallarda afterşoklar ilk zəlzələdən gücünə görə daha az olsa da, bu dəfə əksi müşahidə olundu və bu da qardaş ölkədə narahatlıq yaradıb.

Mövzu ilə bağlı Axar.az-a danışan Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzinin (RSXM) baş direktoru Qurban Yetirmişli bildirib ki, zəlzələnin bu templə davam etməsi seysmologiya üçün xarakterikdir:

“Zəlzələ zamanı qırılma boyu parçalanma gedir. Bəzən görürük ki, birinci təkan çox güclü olur, ardınca isə təkanlar get-gedə zəifləyir. Yaxud da əvvəl zəif təkanlar olur, sonradan böyük lay dəstələrində parçalanma gedəndə təsir daha da çoxalır. Seysmologiyada zəlzələ prosesi çox mürəkkəb olduğuna görə birmənalı olaraq afterşokların azalan və ya artan templə davam etdiyini demək olmaz”.

Q.Yetirmişli Türkiyədə baş verən zəlzələlərin Azərbycana təsirindən də danışıb:

“Türkiyə, İran, Gürcüstan və ümumiyyətlə, bizimlə həmsərhəd ölkələrdə baş verən zəlzələlər Azərbaycanın həmin ölkəyə yaxın regionlarında hiss edilir. Məsələn, Ermənistanda Spitak zəlzələsi olanda Azərbaycanın yarısında hiss olunmuşdu. Yaxud da İranda zəlzələ baş verəndə sərhəd zonasına yaxın Lerik, Astara, Lənkəranda hiss olundu. Başqa ölkədə qeydə alınan zəlzələnin hiss olunma ehtimalı məsafəsindən və gücündən asılıdır”.

Q.Yetirmişli bildirib ki, Türkiydən sonra Ermənistanda qeydə alınan iki ardıcıl zəlzələ yeraltı təkanların Azərbaycana doğru “gəldiyi” anlamında yozulmamalıdır.