"Soyqırım hüquqi bir anlayışdır və Türkiyəyə qarşı bu iddialar tamamilə böhtandan ibarətdir".

Axar.az xəbər verir ki, bu açıqlama ilə Türkiyənin Xarici İşlər naziri Mövlud Çavuşoğlu çıxış edib. Nazir Roma Papasının qondarma erməni soyqırımını tanımasına sərt şəkildə münasibət bildirib:

"Həm Papanın, həm də erməni rəsmilərinin açıqlamaları tarixi həqiqətlərlə uzlaşmır. Papa Fransisk dünənki açıqlamasında təəssüf ki, ayrı-seçkilik etdi. Türklərə və müsəlmanlara qarşı törədilən qətliamları görməzlikdən gəldi. Məsələn, Bosniya və Ruanda hadisələri beynəlxalq məhkəmələr tərəfindən soyqırım olaraq qəbul edilib, Papa isə bunlara kütləvi qırğın deyir. Lakin beynəlxalq aləmdə tanınmayan 1915-ci il hadisələriylə bağlı "soyqırım" ifadəsini işlədir. Burada ziddiyyət və ayrı-seçkilik var. Hər şeydən əvvəl din adamının, xüsusilə son illərdə artan irqçilik, ayrı-seçkilik fonunda, sülh və qardaşlıq mesajı verməsi lazım idi. Soyqırım hüquqi bir anlayışdır və Türkiyəyə qarşı bu iddialar tamamilə böhtandan ibarətdir. Papanın bu yanaşması Türkiyə və türk milləti üçün yox hökmündədir".

Qeyd edək ki, ötən gün Roma Papası Fransisk Vatikanda keçirilən mərasimdə "əsrin ilk soyqırımı ermənilərə qarşı həyata keçirildi" demişdi.