Tofiq Yaqublunun azadlığa buraxılması ilə bağlı xoş niyyət var idi.

Bunu Axar.az-a açıqlamasında Milli Məclisin deputatı, Böyük Quruluş Partiyasının (BQP) sədri Fazil Mustafa Qarabağ qazisi Tofiq Yaqublunun həbsdən ev dustaqlığına buraxılması ilə bağlı danışarkən deyib. BQP sədri bildirib ki, bu vaxta qədər əfv məsələsi problem idi, çünki məhkəmə qərarı qanuni qüvvəyə minməmişdi:

“Azərbaycan məhkəmə sistemi də qəbul olunmuş qərarın ağırlığını və müəyyən dərəcədə yanlışlığını görüb normal bir qərar verdi. Çalışmalıyıq ki, həmişə bu cür qərarlar düşünülüb, daşınılıb vaxtında verilsin”.

Millət vəkili Tofiq Yaqublunun aclıq aksiyasından Amerikada fəaliyyətdə olan müəyyən dairələrin öz məqsədləri üçün istifadə etməyə çalışması məsələsinə də diqqət çəkib:

“Həmişə qaşınmayan yerdən qan çıxarmağa maraqlı olanlar var. Bu cür hadisələr olan kimi öz məqsədləri üçün istifadə etməyə cəhd göstərirlər. Ona görə də bu cür məsələlərdə vaxtında optimal qərarlar qəbul etmək lazımdır ki, vəziyyət bu həddə gəlib çıxmasın”.