"Prezident təqaüdçüsü" Gənclər Birliyinin rəhbəri, Qlobal Gənc Liderlər Akademiyasının Azərbaycan üzrə əlaqələndiricisi Təbriz Raufoğlu 29 aprel-3 may aralığında Almaniyanın Münhen şəhərində G20 ölkələrinin Gənclər Forumunda iştirak edəcək.

Axar.az-a açıqlamasında Təbriz Raufoğlu bildirib ki, tədbirə Forumun əsas kordinasiyasını həyata keçirən "G20 Gənc Məzunlar Assosiasiyası" tərəfindən dəvət olunub. O, əsas məqsədinin G20 ölkələrinin gənclər sektoru ilə ikitərəfli əlaqələrin formalaşdırılması və qarşılıqlı əməkdaşlıq şəraitinin dəyərləndirilməsindən ibarət olduğunu bəyan edib.

Təşkilat rəhbəri əlavə edib ki, Forumda Avropa Parlamentinin "erməni soyqırımı" ilə bağlı qəbul etdiyi qərəzli qətnaməyə etirazını bildirəcək, Fransa və Almaniya nümayəndələri başda olmaqla tədbir iştirakçılarına hüquqi əsaslı xüsusi çap materialları paylayacaq:

"Avropa Parlamentinin elan etdiyi təməl prinsiplərinə zidd olaraq, hüquqi mahiyyət daşıyan məsələyə sırf siyasi yöndən qiymət verilməsi ədalətsizlikdir, heç bir tarixi qaynağa söykənmir və bilavasitə Türkiyə və Azərbaycana basqı xarakteri daşıyır. Ona görə də bütün mümkün imkanlardan yararlanaraq, bu qərəzli qətnaməyə öz etirazımızı ifadə edəcəyik".