"Dövlətlərin xarici siyasətinin uzun bir tarixi keçmişi olur və bu, heç vaxt dəyişmir. Fransa, Rusiya kimi ciddi ölkələrin də regiona qarşı siyasəti təəssüf ki, hansısa dövlətin tədbirinə görə dəyişmir".

Bu barədə Axar.az-a açıqlamasında politoloq Fərhad Mehdiyev bildirib. Türkiyə-Rusiya arasında hazırda gərginləşən siyasi durumu və bu fonda iki ölkə arasındakı layihələrin gələcək taleyinə toxunan politoloq bildirib ki, Ankara bu yolda fikrindən daşınan deyil:

"Rusiyanın Ermənistana qarşı siyasəti ta əvvəldən necə idisə, bundan sonra da o cür davam edəcək. Onun izolyasiya müddətində Türkiyə tərəfindən dəstəklənməsi bu siyasəti dəyişdirmək üçün kifayət deyil, heç vaxt da olmayacaq. Hazırda Fransanın, Rusiyanın bu cür davranmasını əslində normal hesab etmək olar. Erməniləri Cənubi Qafqazda hər zaman silahlandıran Rusiya olub. Bu siyasət yüz illərdir ki, davam edir və bundan sonra da davam edəcək. Bunun qarşısını almaq mümkün deyil. Çünki milli maraqlar dəyişmir. Eyni zamanda o milli maraqlar da məhz bunu tələb edir. Rusiya özünə qarşı ciddi rəqib gördüyü dövlətlərə qarşı Ermənistanı istifadə edir. Ona görə atdığı addımları da yavaş-yavaş həyata keçirir. İndi elə bir məqam yetişib ki, Rusiya-Türkiyə arasında münasibətlər olduqca gərginləşib. Bu, gözlənilən idi. Ancaq maraqlı məqam ondan ibarətdir ki, Türkiyə Rusiya ilə münasibətlərdə apardığı layihələrdən imtina edəcəkmi? Türkiyə nə AES-lərin tikilməsindən, nə də "Cənub axını"nından imtina edəcək".

F.Mehdiyevin sözlərinə görə, əgər türklərlə ruslar arasında silah alış-verişi söhbəti olsaydı, onda məsələyə tamam başqa aspektdən baxmaq olardı:

"Biz bilirik ki, Türkiyə Hava Hücumuna Qarşı Müdafiə üzrə tenderi Çin şirkəti ilə bağlayıb. Qeyd edim ki, Rusiyanı adı bu siyahıda var idi. Baxın, əgər tenderi Rusiya udmuş olsaydı, heç soyqırım məsələsi də bu tenderin nəticələrini dəyişdirməzdi. Əslində, Rusiyanın Türkiyə əleyhinə olması o vaxt məna kəsb edərdi ki, türk iş adamlarının Rusiyada iş aparmasının qarşısı alınar və buna əngəl törədilərdi. Bax onda demək olardı ki, vəziyyəti Rusiya pisləşdirir. Ancaq indi situasiya tamam başqadır. Rusiyanın soyqırım siyasəti bu ölkənin xarici siyasətində dəyişilməyən bir məsələdir və bu belə də qalacaq".