Prezident İlham Əliyev Nazirlər Kabinetinin 2015-ci ilin
birinci yarısının sosial-iqtisadi inkişafının yekunlarına və
qarşıda duran vəzifələrə həsr olunan iclasında neqativ halların
aradan qaldırılması üçün sahibkarlara səslənərək birbaşa onun özünə
müraciət edilməsini istəyib.
Axar.az-ın məlumatına görə, Prezident qeyd edib ki, xoşagəlməz
hallar baş verən zaman sahibkarlar birbaşa ona e-mail vasitəsilə,
məktub yazmaqla müraciət edə bilərlər:
"Bax, bu gün mən bütün aidiyyəti qurumlara və eyni zamanda,
sahibkarlara göstəriş verirəm. Mənə məlumat versinlər,
qorxmasınlar, siqnal versinlər, məktub yazsınlar, e-mailə
yazsınlar. Əgər belə hallar varsa, o xoşagəlməz işlərlə məşğul olan
dərhal öz cəzasını alacaq".
Məlumat üçün qeyd edək ki, Prezidentin rəsmi internet saytına
(prezident.az) daxil olub, ana səhifədə "Prezidentə məktub yazmaq"
bölməsini tıklamaqla, çox asanlıqla məktub göndərmək mümkündür.
Məktub qısa, yığcam və lakonik olmalı, 1500 işarəni aşmamalıdır.
Bütün bu qaydalarla bağlı prezident.az saytının sözügedən
bölməsində ətraflı məlumat verilir və məktub göndərilmə mərhələsi
izlənilir. Şikayətçiyə sadəcə göstərilən o qaydalara əməl etmək
qalır.