"Qalx, Ermənistan" hərəkatının liderlərindən olan David Sanasaryan iyulun 29-da axşam saatlarında xəstəxanaya yerləşdirilib.

Axar.az erməni mediasına istinadla xəbər verir ki, Sanasaryan Respublika meydanındakı aksiya zamanı polisin ona güc tətbiq etməsindən, yerə yıxmasından və başından zədə almasından şikayətlənib.

Xatırladaq ki, enerji qiymətlərinin avqustun 1-dən etibarən bahalaşmasına etiraz edən "Qalx, Ermənistan" hərəkatı iyulun 27-dən başlayaraq, 3 günlük oturaq aksiyaya qərar vermişdi. Ermənistan qanunlarına görə 100 nəfərlik aksiya üçün icazə istənilmədiyindən, hərəkat fəalları 27 iyulda 30 nəfərlə başlayan oturaq aksiyanı 28 iyulda 60, 29 iyulda isə 90 nəfərlə davam etdirməyə qərar vermişdilər. İrəvan polisi isə onları Respublika meydanından sürüyə-sürüyə çıxarmışdı. Buna baxmayaraq, aksiyaçılar etirazı davam etdirmişdilər.