13 noyabr tarixində Şuşa yaxınlığında azərbaycanlı və rus hərbçilərin olduğu posta qumbara ataraq, 3 azərbaycanlı əsgərin yaralanmasına səbəb olan erməni terrorçu Norayr Mirzoyanla bağlı Baş Prokurorluq tərəfindən açılan cinayət işi üzrə istintaq hazırda davam edir.

Bu bardə Axar.az-ın sorğusuna cavab olaraq Baş Prokurorluğun mətbuat xidmətindən bildirilib.

“İstintaq işi ilə bağlı əlavə məlumat olduğu təqdirdə rəsmi xəbər veriləcək”, - açıqlamada qeyd olunub.

Xatırladaq ki, N.Mirzoyan rus sülhməramlıları tərəfindən saxlanıldıqdan sonra Xankəndidəki heç kəs tərəfindən tanınmayan, qondarma, separatçı qurumun “hüquq-mühafizə orqanlarına” təhvil verilmişdi.

Azərbaycan Respublikası Baş prokuroru tərəfindən isə terror faktına görə Cinayət Məcəlləsinin 29, 120.2.1 (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürməyə cəhd), 29, 120.2.3, (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürməyə cəhd), 29, 120.2.4 ( xüsusi amansızlıqla və ya ümumi təhlükəli üsulla adam öldürməyə cəhd), 214.2.3 (terrorçuluq-odlu silahdan və silah qismində istifadə olunan predmetlərdən istifadə etməklə törədildikdə), 228.3 (qanunsuz olaraq odlu silah, partlayıcı maddə əldə etmə, başqasına vermə, satma, saxlama, daşıma və gəzdirmə mütəşəkkil dəstə tərəfindən törədildikdə) və digər maddələri ilə cinayət işi başlanmaqla istintaqın aparılması Baş Prokurorluğun İstintaq idarəsinə həvalə edilmişdi.