Seçkilərdə iştirak edib-etməyəcəyimlə bağlı hələ də tərəddüdlü durumum qalır. Bakı dairələrindən birinin üzərində dayanmışam. İlkin hazırlıqlar da aparılıb. Lakin qəti qərarı verməmişəm.

Axar.az xəbər verir ki, bu fikirləri "Yeni Müsavat" qəzetinin baş redaktoru Rauf Arifoğlu Feysbuk səhifəsində yazıb.

Baş yazarın sözlərinə görə, sentyabrın 25-nə qədər zamanı var: "Seçki mühiti, ortam, şərtlər uyğun olsa və inansam ki, mənim qələbəm keçən dəfələrdə (2005-2010) olduğu kimi, dəyişdirilməyəcək, namizədliyimi verəcəm".

R.Arifoğlu hesab edir ki, bunlardan hər hansı biri olmasa, boşuna zaman və pul xərcləmək fikri yoxdur:

"Rayonlara gedib, seçki kampaniyası keçirtmək isə, əvvəldən də dediyim kimi, istisna olunur. "Yeni Müsavat"ın işinə, həyatımızın ritminə mənfi təsir edəcək, heç uyğun deyil.

Bu baxımdan, bir sıra "qaranquşlar" məni kimlərləsə üz-üzə qoymaq zəhmətini çəkməsinlər. Namizədliyimizi versək, Bakıdan verəcəyik, verməsək, "Yeni Müsavat", "musavat.com", "minval.az" adlı tribunalarımızdayıq..."