Ölkə prezidentinin tapşırıq və tövsiyələrinə uyğun olaraq vətəndaşlara qayğı və diqqət gündən-günə artırılır.

Axar.az xəbər verir ki, bu sətirləri Prezidenti Administrasiyasının Sənədlər və vətəndaşların müraciətləri ilə iş şöbəsinin müdiri Süleyman İsmayılov öz qeydlərində yazıb.

PA rəsmisi 2015-ci il noyabrın 12-də imzalanmış "Vətəndaşların müraciətləri haqqında" Azərbaycan Respublikasının Qanunu və bu Qanunun tətbiqi barədə fərmanı geniş yazısında şərh edib.

Onun sözlərinə görə, hər bir dövlət orqanında, idarə və müəssisədə, yəni müraciətə baxan subyektdə bu sahədə məsuliyyət daha da yüksəldilməlidir.

"İlk növbədə vacib məsələ qanunçuluğa riayət edilməsi, vətəndaşların müraciət hüququnun sərbəst və könüllü həyata keçirilməsinə şərait yaradılması, müraciətlərə dair vahid tələblərin müəyyən edilməsi, fiziki və hüquqi şəxslərin hüquqlarının və qanuni mənafelərinin qorunması, bu işdə ayrı-seçkiliyə və süründürməçiliyə yol verilməməsi, şəffaflığın təmin edilməsi və vətəndaşların müraciət etmək hüququ ilə dövlət maraqlarının uzlaşdırılmasıdır".

Vətəndaşlar bilməlidirlər ki, Qanunun 6.9-cu maddəsində göstərildiyi kimi, müraciətin mətni oxunaqlı olmalı, müraciətdə edilən təklif və ya tələb aydın ifadə edilməlidir. Müraciətin mətnində təhqir və böhtana yol verilməməlidir".

S.İsmayılov qeyd edib ki, ölkənin uğurlu inkişafı üçün vətəndaş-məmur münasibətləri böyük əhəmiyyət kəsb edir:

"Azərbaycan bu sahədə də nümunəvi ölkə olmalıdır. Məmurlar yaddan çıxarmamalıdır ki, onlar xalq üçün işləyirlər, onlar xalqın xidmətçiləridir".