Nə Azərbaycan, nə də Rusiya Müdafiə Nazirliyi bölgənin tamamilə terrorçulardan təmizlənməsini təsdiq edib. Verilən bəyanatların əhalidən silahların yığılması və ələ keçirilən silah anbarları haqqında olduğunu görürük.

Bu sözləri Axar.az-a dünən Xankəndidə Rusiya-Azərbaycan birgə patrulunun naməlum şəxs tərəfindən snayper silahından atəşə tutulması haqqında danışan hərbi ekspert Ədalət Verdiyev deyib.

O, darama əməliyyatının labüd olduğunu vurğulayıb:

“Ayrı-ayrı silahlıların meşələrdə, mağaralarda, dağlıq ərazilərdə mövcud olan digər növ sığınacaqlarda, evlərin damlarında, zirzəmilərdə gizlənməsini, silah saxlamasını, müəyyən zamanda və məhdud görmə şəraitində fürsətdən faydalanaraq atəş açmasını istisna etmirik. Fikrimcə, yaxın bir həftə ərzində bütün evlərin və mümkün sığınacaq yerlərinin baxışdan keçirilməsi yekunlaşacaq. Vəziyyətdən yeganə çıxış yolu yenidən nəzarətimizə keçən ərazilərdə darama əməliyyatının həyata keçirilməsi və mümkün müqavimət ocaqlarının zərərsizləşdirilməsidir”.