Ana səhifə Gündəm |
Prezidentin dünənki müşavirəsi yeni, ən vacib qərarların alınmasına xidmət edir və hökumətin üzərinə daha qısamüddətli, təxirəsalınmaz vəzifələr qoyur.
Bu barədə Axar.az-a millət vəkili Zahid Oruc danışıb. Deputat bildirib ki, dövlət başçısının dünənki müşavirədə qarşıya qoyduğu məsələlər kifayət qədər mühüm iqtisadi xarakterlidir və bu, sosial, maliyyə proseslərini uğurla aparmağa imkan verəcək:
"Mühüm özəlləşmə proqramının qəbulu istiqamətində addım atılacaq. Bu o deməkdir ki, dövlət bir sıra sahələrdəki öhdəliyinə yenidən baxacaq. Mühüm səhmdar cəmiyyətlər var ki, dövlətin səhm paketi orada 51 faizə qədərdir, ancaq dövlət büdcəsindən ayrılan subsidiyalar kifayət qədər böyükdür, onların ağırlığını belə bir dövrdə büdcə vəsaitləri hesabına daşımaq uyğun olmazdı.
İkincisi, özəlləşmə imkan verəcək ki, rəqabət prosesi və sahibkarlıq fəaliyyəti daha da güclənsin.
Üçüncüsü, kredit öhdəliyi altında olan insanlarla bağlı Mərkəzi Bank və Maliyyə Nazirliyi məzənnə fərqinin aradan qaldırılmasının başqa bir formada hökumət tərəfindən qarşılanması ilə bağlı addım atmağa hazırlaşır. Hesab edirəm ki, bu, vətəndaşların banklara inamını bərpa edəcək.
Dördüncü, dövlət başçısı bir daha dilə gətirdi ki, bir sıra lazımsız qurumlardan azad olmağın vaxtıdır. Bunlar təxminən bəllidir. Müasir dövrdə rentabelliyi olmayan qurumu saxlamağın bir adı yoxdur. Əminəm ki, çox yaxın zamanda hökumətin optimal tərkibi onun çevik, işlək modelini formalaşdıracaq".
Qeyd edək ki, dünən Azərbaycan Respublikasının Prezidenti İlham Əliyevin yanında iqtisadi və sosial məsələlərin həlli ilə bağlı müşavirə keçirilib.
Tarix
2016.01.19 / 09:00
|
Müəllif
Aygün Yusibova
|