Ana səhifə Gündəm |
Türkiyə Qazaxıstan, Azərbaycan və digər postsovet ölkələri ilə bundan sonra da əlaqələrini inkişaf etdirməyi hədəfləyir.
Bu sözləri Axar.az-a açıqlamasında rusiyalı politoloq Qriqori Trofimçuk söyləyib. Onun sözlərinə görə, Türkiyə Baş nazirinin Qazaxıstana səfərinin əsas məqsədlərindən biri də İpək yolu layihəsi ilə bağlıdır:
"Bəzi ekspertlər artıq Astananı Moskvaya qarşı qoymağa çalışırlar. Onlar Türkiyə ilə münasibətlərdə Astananın tam ayrı yol tutduğunu iddia edirlər. Lakin burada məsələ bir qədər fərqlidir. Qazaxıstan rəhbərliyi bütün siyasi faktorları dəqiq bilir və özünün strateji istiqamətlərinin heç birini, xüsusən də Avrasiya Birliyinin inkişafı işini pozmaq istəmir. Nazarbayev Qazaxıstan-Türkiyə münasibətlərində Rusiyaya zərər verəcək heç bir addım atmayacaq. Türkiyə Baş nazirinin Qazaxıstana səfəri, əslində, Türkiyənin Rusiya ilə münasibətlərdə ciddi problemlərin başlanmasından sonra Astananın Ankara ilə əvvəlki razılıqları köhnə formatda saxlanılmasını aydınlaşdırmaq, yaranan bəzi inamsızlıqları aradan qaldırmaq məqsədi daşıyırdı. Beləliklə, Davudoğlunun səfərinin əsasında regionda geosiyasi şəraitin qəflətən pisləşməsi fonunda Qazaxıstan rəhbərliyi ilə Ankaranın münasibətlərinin əvvəlki səviyyədə qalmasına əmin olmaq dururdu. Bununla belə, həmin münasibətlərdə kəskin istiləşməni hələlik gözləməyə dəyməz. Birgə layihələr yalnız əvvəllər müəyyən edilmiş parametrlərdə həyata keçiriləcək. Bu format həmçinin Azərbaycanın cəlb olunduğu layihələrə də aiddir. Lakin bir şeyi nəzərə almaq lazımdır ki, Yaxın Şərqdəki situasiyanın bundan sonra da pisləşməsi Cənubi Qafqaz və Xəzəryanı ölkələri birbaşa destabilizasiya ilə təhdid edə bilər. Bu, müəyyən edilmiş layihələr və nəqliyyat kommunikasiyalarının aradan qaldırılmasını qaçılmaz edir. Türkiyə çalışır ki, müstəqil siyasət yürütsün, amma müharibənin getdiyini, Türkiyəninsə burada NATO üzvü olduğunu xatırlamaq lazımdır".
Qeyd edək ki, şənbə günü Türkiyə Baş naziri Əhməd Davudoğlu Qazaxıstana səfər edib. Səfəri çərçivəsində o, Prezident Nursultan Nazarbayev, Baş nazir Kərim Mənsimovla görüşüb. Səfərdən öncə mətbuata açıqlama verən Davudoğlu Qazaxıstanı özünün ikinci vətəni adlandırıb.
Tarix
2016.02.09 / 09:18
|
Müəllif
İlkin Həsənov
|