Vyanada Avropada Təhlükəsizlik və Əməkdaşlıq Təşkilatı Parlament Assambleyasının (ATƏT PA ) 23-cü qış sessiyası başlayıb.

Bu barədə Axar.az-a sessiyada iştirak edən ATƏT PA-nın nümayəndə heyətinin rəhbəri, millət vəkili Azay Quliyev məlumat verib.

Millət vəkilinin sözlərinə görə, hazırda ümumi komitələrin birgə sessiyası keçirilir:

“Bundan sonra isə Siyasi məsələlər və təhlükəsizlik, Demokratiya, insan haqları və humanitar məsələlər, İqtisadiyyat, elm, texnologiya və ətraf mühit üzrə ümumi komitələrinin və Daimi Komitənin iclasları keçiriləcək.

Azərbaycanla bağlı ayırıca məsələ gündəliyə salınmasa da, Prezident İlham Əliyevin müəyyən etdiyi - ölkəmizin xarici siyasətininin yeni prioritetləri barədə ATƏT PA-nı məlumatlandıracağıq. Bundan başqa iclaslarda bir sıra məsələri qaldırıb, müzakirəyə təqdim edəcəyik”.

Qeyd edək ki, iki gün davam edəcək sessiyada ATƏT PA-dakı nümayəndə heyətinin rəhbəri Azay Quliyev, üzvləri Tahir Mirkişili, Ağalar Vəliyev və Tural Gəncəliyev iştirak edir.