Rusiya və Türkiyə arasında genişmiqyaslı müharibə başlasa, bu, istənilən halda Ukraynaya da toxunacaq.

Axar.az xəbər verir ki, bunu Ukrayna mətbuatına müsahibəsində ekspert Sergey Zqurets söyləyib. Onun sözlərinə görə, hazırda Ukraynanı xilas edən yeganə amil Rusiyanın bir neçə cəbhədə savaş aparmasıdır:

"Türkiyə ilə olan konflikt Rusiya üçün Donbasdakı müharibədən daha ciddi problemdir. Ona görə ki, Moskva və İstanbul arasındakı gərginliyi Putin öncədən proqnozlaşdıra bilməmişdi. Lakin bu, Ukraynanın dincəlməsinə və hər şeydən kənarda qalmasına imkan verməyəcək. Ölkənin şərqində hərbi şəraitin eskalasiyasına cəhd etməklə Rusiya Kiyevdəki gərginliyi qoruyub saxlamağa cəhd edir. Burada əsas məqsəd Rusiyanın situasiyanı nəzarət altında saxlaya bilmədiyi ilə bağlı görüntülərin yayılmasının qarşısını almaqdır. Bu gün rus qoşunları daha çox Türkiyə istiqamətinə kökləniblər. Ona görə də çox ağır dövrə hazırlaşmalıyıq".