Azərbaycan Avropa Birliyi və Avropa Parlamentinin Dağlıq Qarabağ münaqişəsinin həllinə dair ən azı beynəlxalq hüquq normalarına əsaslanan təkliflər verməsində çox maraqlıdır.

Bu fikir millət vəkili Asim Mollazadənin Axar.az-a verdiyi açıqlamada yer alıb. Deputat Avropa Birliyinin Xarici əlaqələr və təhlükəsizlik siyasəti üzrə ali nümayəndəsi Federika Moqerininin Azərbaycana səfərinə münasibət bildirib:

"Dünyanın hüququn aliliyini bəyan edən bütün ölkə və təşkilatlar bu istiqamətdə hansısa addımlar ataraq sülhün əldə olunması istiqamətində Azərbaycana dəstək verməlidirlər. Bizə təcili sülh lazımdır. Çünki hazırda Azərbaycan bölgədə dünya üçün çox mühüm olan böyük layihələri həyata keçirir. Çox istərdik ki, Avropa Birliyi Ermənistanın təcavüzkar siyasətinə qiymət versin. Rəsmi Bakı Avropa Birliyindən beynəlxalq hüquq normalarına əsaslanan qərarlar gözləyir".

Qeyd edk ki, fevralın 29-da Avropa Birliyinin Xarici əlaqələr və təhlükəsizlik siyasəti üzrə ali nümayəndəsi Federika Moqerini Cənub Qaz Dəhlizi layihəsinin Məşvərət Şurasının II iclasında iştirak etmək üçün Azərbaycana səfər edib.