Son günlər Urmiyanın mərkəzi zindanında ikisi qadın olmaqla 11
nəfər asılaraq edam edilib.
"Amerikanın səsi"nin məlumatına görə, edam edilənlərin altısı
narkotik qaçaqçılığı, biri isə qətl ittihamı ilə mühakimə
olunublar. Digər dörd nəfərin hansı ittihamlarda təqsirli bilindiyi
bəlli deyil.
Veb-səhifələr edam edilən 7 nəfərin adını da açıqlayıb. Onlar
Kamil Səidi, Kamil Həbibi, Zəki Xani, Məhəmməd Gürcü, Müsəyyib
Sadati, Vəli Məhəmmədzadə və Yədulla Məhmudidir. Digər dörd nəfər,
o cümlədən edam edilən iki qadının kimliyi ilə bağlı isə məlumat
verilmir.
Son bir neçə ay ərzində, xüsusilə də Həsən Ruhaninin prezident
seçilməsindən sonra Cənubi Azərbaycanın Urmiya, Ərdəbil və Təbrizin
mərkəzi zindanlarında icra edilən edam hökmlərinin sayının kəskin
artdığı bildirilir. Güneydən gələn məlumatlara görə, hələ
zindanlarda xeyli məhbus var ki, onlar edam olunacaqları günü
gözləyir. Edam cəzasına məhkum olunanlar arasında milli fəallar,
Güneyin istiqlalı və haqqı uğrunda mücadilə aparan şəxslərin də
olduğu bildirilir.
"İranda narkotik qaçaqçılığı ilə ittiham edilənlərin əksəriyyəti
yoxsul insanlar, habelə qadınlar, etnik qruplar və dini azlıqların
nümayəndələri, eləcə də xarici ölkələrin vətəndaşlarından ibarət
olur. Bunların çoxu ədalətsiz məhkəmələrdə mühakimə edilir", -deyə
"Amnesty İnternational" İranla bağlı yaydığı bəyanatında qeyd
edib.