ABŞ-ın sanksiyalarına məruz qalan rusiyalı senator və milyarder Süleyman Kərimov İlon Maskın "SpeysX" şirkətində payı olub və öz səhmlərini müvəkkil etdiyi fond (trust) vasitəsilə idarə edib.

Axar.az "Anyus.az"a istinadla xəbər verir ki, Kərimov 2017-ci ildə yaradılan və Delaver ştatında yerləşən “Heritage Trust” vasitəsilə "SpeysX"in səhmlərini alıb.

"Blumberq" iki keçmiş yüksək vəzifəli ABŞ rəsmisinin sözlərinə istinadən bildirib ki, trast əvvəlcə "SpeysX"in təxminən 1%-nə sahib olub.

ABŞ hökuməti 2018-ci ilin aprelində Süleyman Kərimovun adını sanksiya siyahısına daxil edib. O, Oleq Deripaska, Viktor Vekselberq və digər rusiyalı milyarderlərlə birlikdə sanksiyalara məruz qalıb.

“Heritage Trust”ın idarə olunmasını həyata keçirən "Citigroup" şirkəti bu məsələ ilə bağlı ABŞ Maliyyə Nazirliyinə müraciət edib, trasta və ona bağlı qurumlara məhdudiyyət qoyulmasına ehtiyac olmadığını bildirib. Lakin 2022-ci il iyunun sonunda ABŞ Maliyyə Nazirliyinin Xarici Aktivlərə Nəzarət İdarəsi (OFAC) "Heritage Trust"ın aktivlərini dondurub. O zaman bu aktivlərin ümumi dəyəri 1 milyard dollar olub.

Həmin dövrə qədər Kərimov "SpeysX"dəki payını artıq satıb.

Hazırda 58 yaşlı Süleyman Kərimov Rusiyanın ən varlı iş adamları siyahısında 17-ci yerdə qərarlaşıb.

Ümumi dünya sıralamasında isə 282-ci yerdədir və sərvəti təxminən 9,9 milyard dollar dəyərindədir.