Erməni separatçılarının keçmiş "müdafiə naziri" Samvel Babayan Qarabağda yenidən rəhbər vəzifələrdən birinə gətirilə bilər.

Axar.az xəbər verir ki, bunu "Azadlıq" radiosuna açıqlamasında erməni siyasətçi Ayk Xanumyan söyləyib. Onun sözlərinə görə, Babayanın yenidən "Dağlıq Qarabağın müdafiə naziri" olacağı istisna edilmir.

Qeyd edək ki, Samvel Babayan Xankəndində anadan olub. 80-ci illərin sonunda Ermənistanda başlayan "Miatsum" hərəkatının əsas iştirakçılarından biri olan Babayan sonradan Qarabağ müharibəsinə qatılıb. O, Şuşanın işğal edilməsi üçün hazırlanan əməliyyatın əsas müəlliflərindən biridir.

Babayan 1993-1999-cu illərdə Qarabağ separatçı rejimində "müdafiə naziri" vəzifəsini icra edib. 2004-cü ildə o, Qarabağdakı qondarma rejimin lideri Arkadi Qukasyana qarşı sui-qəsd təşkilində günahlandırılaraq həbs edilib. Sonradan azadlığa çıxan Babayan özünə partiya yaratsa da, heç bir uğur əldə edə bilməyib. Həddən artıq borcu olması onu ölkədən qaçmağa vadar edib. Babayan bir müddət öncə Rusiyadan İrəvana qayıdıb.