11:33

Fevralın 24-də səhər saatlarında Bakı Dövlət Universitetində tarix fakültəsinin magistratura üzrə dekan müavini Rəfael Süleymanov vəfat edib.

Qeyd edək ki, Rəfael Süleymanov fevralın 21-də BDU-da keçirilən aksiyada tarix fakültəsinin tələbəsinin şikayətçi olduğu müəllimdir. BDU-dakı qaynağın "Yeni Müsavat"a verdiyi xəbərə görə, R.Süleymanov həmin gündən çox əsəbi və stresli olub. Bu gün səhər saatlarında BDU-ya gələn R.Süleymanov 1 saat sonra auditoriyada vəfat edib.

Aldığımız xəbərə görə, R.Süleymanov aldıqları aşağı qiymətlərdən apelyasiya verən tələbələrin cavablarını yenidən yoxlayıb və onların çoxunu olduğu kimi saxlayıb. Bu isə bir çox tələbələrin narazılığına və söz-söhbətə səbəb olub.

12:40

Tələbə qızın rüşvət aldığını iddia etdiyi müəllimin ölüm xəbəri təkzib olunub.

"Axar.az" bu haqda Feysbuk sosial şəbəkəsinə istinadən bildirir ki, ölən müəllim əslində başqa bir müəllim olub.

14:56

"Bakı Dövlət Universitetinin tarix fakültəsinin dekan müavini, tarix elmləri doktoru, professor Rəfael Süleymanov bu gün işə gələrkən liftin qarşısında dünyasını dəyişib. İddia edildiyi kimi, Rəfael Süleymanov tələbə R.Kitçiyevanın şikayət etdiyi şəxs deyildi".

Bunu BDU-nun mətbuat xidmətini rəhbəri Pərvanə İbrahimova FB-də yayıb.