Ermənistan ilk növbədə iqtisadi səbəblərdən Türkiyə ilə münasibətlərin normallaşmasında maraqlıdır.

Axar.az xəbər verir ki, bunu rusiyalı politoloq Sergey Markov deyib.

“Paşinyan Ermənistan cəmiyyətinə göstərmək istəyir ki, ölkəsilə Azərbaycan və Türkiyə arasında yaxınlaşma prosesi dönməzdir. Bu baxımdan sözügedən səfər Ankaranın İrəvanı Bakı ilə Azərbaycan şərtləri əsasında sülh müqaviləsi imzalamağa sövq etməsi baxımından faydalıdır. Türkiyənin Ermənistana təklif edə biləcəyi əsas amillər iqtisadi blokadanın tamamilə aradan qaldırılması, nəhəng Türkiyə iqtisadiyyatının erməni biznesinin üzünə açılması, Türkiyə sərmayəsinin Ermənistanda mümkünlüyü, sərhədlərin açılması və diplomatik münasibətlərin bərpasıdır”, - o bildirib.

Markovun sözlərinə görə, Ermənistanla münasibətlər Azərbaycan üçün əsas mövzulardan biridir:

“Azərbaycan liderinin dünən Türkiyəyə səfəri zamanı yəqin ki, həm Əliyev, həm də Ərdoğan Ermənistanla bağlı ortaq mövqeni müzakirə edib və formalaşdırıb. Paşinyanın Ermənistanı Azərbaycana və Türkiyəyə yaxınlaşdırmaq üçün etdikləri İrəvan üçün faydalıdır, bu, Ermənistana yeni inkişaf səhifəsi açmağa imkan verəcək. Bu, təkcə Ermənistan sakinləri üçün deyil, həm də nəhəng erməni diasporunun nümayəndələri üçün iqtisadi inkişaf imkanları açacaq”.