2019.03.20. 20:40

Xınalıq yolunun 32-ci kilometrliyində baş verən qar uçqunu ilə bağlı AAYDA məlumat yayıb.

Axar.az xəbər verir ki, qurumun mətbuat katibi Anar Nəcəfli bir-neçə gündür ki, dağlıq ərazilərdə davam edən qeyri-sabit hava şəraiti və qarın yağmasına baxmayaraq, Azərbaycan Avtomobil Yolları Dövlət Agentliyinin canlı qüvvə və texnikalarının ərazilərə səfərbər olunduğu, gücləndirilmiş iş rejimində avtomobil yollarında qarın yağması ilə əlaqədar yaranan problemlərin aradan qaldırıldığını açıqlayıb.

“Ötən gün intensiv şəkildə qarın yağması nəticəsində Quba-Xınalıq yolunun 34-36-cı km-lik hissəsində, dərədə qar uçqunu qeydə alınıb. Ərazidə olan əməkdaşlarımızın və texnikanın köməkliyi ilə yolda qalan vətəndaşlar ərazidən çıxarılıb.

Yolun qar uçqunundan təmizlənməsi üçün ötən gün hava qaralana kimi aparılan işlər bu gün səhər saatlarından da davam etdirilir. Əraziyə əlavə texnika və canlı qüvvə cəlb olunub. Qeyri-sabit hava şəraiti və relyefin çətin olmasına baxmayaraq, yolun axşam saatlarına qədər açılması üçün işlər mümkün dərəcədə sürətlə aparılır.

Aparılan işlər nəticəsində hazırda yolun 34-cü km-nə qədər avtonəqliyyat vasitələrinin hərəkətində hər hansı bir çətinlik yoxdur. Buna baxmayaraq, təcrübəsi az olan və əraziyə bələd olmayan sürücülərdən, avtonəqliyyat vasitəsi hava şəraitinə uyğun təchiz olunmayanlardan sözügedən yoldan istifadə etməsi tövsiyə olunmur”, - A.Nəcəfli bildirib.

Qeyd edək ki, ötən gün Xınalıq yolunun 32-ci kilometrliyindən başlayaraq, 4 hissədə qar uçqunu olduğu, bəzi maşınların uçqun altında qaldığı, əraziyə gedən texnikanın isə xarab olması nəticəsində yolun təmizlənməsi işlərinin yubandığı barədə xəbər yayılmışdı.