Əməkdar artist Bəhram Bağırzadə ərəb turistlərə azərbaycanlı bir xanımı göstərərək, ona qarşı əxlaqsız hərəkət edən bir şəxsi döyməsindən danışıb.

Kult.az xəbər verir ki, Yutubda yayımlanan Murad Arifin aparıcısı olduğu verilişin qonağı olan əməkdar artist ərəb turistlərin Bakıda etdikləri hərəkətlərdən danışıb. B.Bağırzadə bildirib ki, ərəb turistlərin bu gün Bakıda Azərbaycan qadınlarına qarşı əxlaqsız münasibətinin günahkarı elə özümüzük:

“Ərəblər gəlirlər Bakıya, “Tarqovı”da gəzişirlər və nalayiq hərəkətlər edirlər. Bu, heç bir azərbaycanlı kişisinin xoşuna gəlmir. Əgər kimsə bunu qəbul edirsə, bu onun problemidir, mən bunu götürə bilmirəm. Əgər ərəblər gəlib özlərini burada pis aparırlarsa, deməli, biz günahkarıq. Deməli, biz o səviyyəyə gətirib çatdırmışıq ki, onlar bizim azərbaycanlı qadınlarımıza sataşırlar.

Bizim azərbaycanlı kişilər də Rusiyaya gedəndə özlərini Azərbaycandakı ərəblər kimi aparmasınlar. Çünki biz indi ərəblərə hansı gözlə baxırıqsa, bizim kişilərə də Rusiyada o cür baxırlar. İctimai qınaq olmalıdır bu məsələdə”.

B.Bağırzadə məhz bu məsələ üstündə şəhərdə bir nəfəri necə döydüyünü də deyib:

“İfadəmə görə üzr istəyirəm, keçən dəfə birinin çənəsinə birini qoydum. Həmin azərbaycanlı kişi, kül onun kişi başına, milli geyimdə olan bir azərbaycanlı qızı ərəb turistlərə göstərib danışırdı, turistlər də gülürdü bizim xanıma. Mən bunu kənardan görüb dözmədim, elə ərəblərin yanında cumdum onun üstünə və çənəsindən birini qoydum. Düzdür, bundan sonra problemlərim yarandı, ancaq mən bunu etdim”.